Isch habb do mol ä Idee!

Ward ihr in letschda Zeit ä mol driwwä? Ihr wissd schunn wo. Driwwä uff de falsch Rhoiseit? In dä vabodänä Schtadt? Uff de Rhoischønz, in Lumbähaafä? Isch mähn isch geh jo nomalaweis nädd niwwa, dess hawwisch als Bu schunn beigebrocht kriggt. Awwa letschdäns war isch mol in Oggerschäm oigeladä, wass willsch machä. Isch mähn Brodwärschd unn Schøllä kännä se jo. Unn dess Gebordsdagskind iss a klor gewesä, alla hawwischma de Hut dief in die Schdärn gezogä, habma de Hemdkragä nuffschlagä unn binn klømmhoimlisch in die Elektrisch Rischdung „driwwä“ gschdiggä...

Kennt ihr de Berlina Platz? Also habdan gekännt? Mit Tordäschachtl unn so? Dess iss løng her. Bliehendä Løndschafdä sinn jo imma so ä Sach, vor alläm in Rhoilønd-Palz. Mit Inveschdorä unn Bauträga unn ønnarä Pleidä iss die Sach noch komplizierda. Als wäre die Lumbäheefa schtedäbaulisch nädd genug gschdrooft, hawwäse jetzad newa änner abgebrochänä Brigg a noch ä Riesäloch. Dess missda eisch mol øguggä, dess glaabt da känn Mänsch! De Häbbädd, dämm soi Mudda iss vunn driwwä, hodd jetzt bei de Birgameschdann än Øtrag uff „Umbenennung der Stadt Ludwigshafen in Ludwigsloch“ gschdellt. Damit newä Ludwigsburg, Ludwigslust, Ludwigswinkel unn ewä derä gleischnømischä Schtadt am Bodäsee nømentlisch Klarheit härschä deed, hedda gschriwwä, sagda. Dess zäntrale Loch wer ä Alläschdellungsmerkmal, do kännt ma doch margäding-meeßisch was draus machä, mähnda, dä Häbbädd. Isch mähn jo, dass de Häbbädd do iwwatreiwä duud. Der war hald løng nimmi in Stuttgart. Do kønnsch seit Johrä ä Loch sehä, do passt die halb Palz plus Ønilin noi! Isch mähn, also mol ehrlich, jetz wo isch so driwwa noochdänk... „Stuttloch“ wär doch ä schä, odda? Isch glaab isch wärrä mol dännä ihrn Owwabirgameeschda, de Noppers Frønk ørufä, mol sehä...

Kontakt: kall@mamo.de