In de Palz fehlt ä Konzept

Alla gut, zugewwä, moin Oriändierungssinn iss wirklisch nädd de Beschdä. In de Schtadt geht’s tipptopp, awwa in de freiä Nadur bin isch uffgschmissä. Wass isch misch schunn im Keffadela Wald faloffä hab, geht uff kä Kuhhaut. Obwohl isch, wønn isch’s so räschd bedänk, alle Wege schunn zisch mol durschhab. Ä mol fagessä abzubiegä, schwupps weeß isch widda nimmi, wo isch bin. Dess hodd schunn die poinlischsdä Vawicklungä gewwä: Als junger Kerl, frisch de Fihraschoi, hawwisch mol ärschd in Schpeya unn hinnaher in Ketsch zu duä khappt. Bei beidäm hawwisch gewisst, wie isch hiekumm – vunn Mønnem aus. Groß unn weit war die Kurpalz jo fär misch domols. Dess änä wa fär misch badisch, Rischdung Kallsruh, dess onnarä äfach in de Palz hald. Also bin isch in Seeläruh vunn Schpeya iwwa die B 9 noch Lumbehaaafä, iwwa die Brigg, dursch gønz Mønnem dursch, nooch Neggara hinnänaus unn iwwa die Rhoinau Rischdung Schwetzingä, räschts ab vunn de B 36 nooch Ketsch. Wie isch misch dønn beim Økummä beklagt hab, wass dess fer ä Fahrarei war, hawwä die Hewwl Tränä gelacht. Dassma do blooß iwwa der Rhoi hedd fahrä missä, do wer isch nädd druff kummä. Moin Vadda hodd imma gsacht, isch därfd dess im gonzä Lewä nie jemønd fazehlä, awwa eisch kønnisch jo sagä, gell?

Hilflos bin isch im Pelzawald beim Laafä, „Wøndern“ gehä onnarä, mir gehä Laafä. Deswegä schließ isch misch imma Leit ø, die sisch auskännä, weil isch allä wahrschoinlisch näddämol vumm Oppaua Haus uffs Lømbärtskreiz finne deed. Isch klømma misch trotzdäm øn jedi Markierung. Bei jedäm Schdrisch („Mir sinn jetz awwa nimmi uff Weiß-Gelb, gell?“) und Pfeil („Nä, der zeigt awwa mehr so do driwwä nuff!“) deed isch gärn dischpedierä. Imma änd die Diskussion so: „Dämm Käll, der wo die Schdrisch unn 1000 Schildlin do øn die Bääm hiemolt, dämm deed isch gärn mol Bscheid sagä!“

Unn midd moim Misstrauä hawwisch a Räschd khappt: Jetz isses nämlisch raus: „Uns fehlt ein Gesamtkonzept“, hodda gsacht, de Scheff vumm Pelzawaldfaroin, weilsä vor lauda Wegbezeischnungä ganimmi wissä, wo de Wildsauweg zum Kaiser-Friedrich-Weg wärd odda in die Pelza Woisteig iwwageht. So sieht’s nämlisch aus! Dess kønn isch eisch a ohnä Oriendierung beschdedischä. Dass do ä Konzept fehlt, sagt eisch de Kall uff Pelzisch: „Dess hänn isch eisch kännä glei sa’n!“

Kontakt: kall@mamo.de