Isch weeßjo nädd, obdas mitkriggt habt, awwa de Herberger iss jetz in de Karwoch widda groß rauskummä, also nädd de Sepp, der hodd weidahin soi Ruh. Isch mähn soin Urgroßneffä de Mischael, de Muggämacher, Klavierspieler unn Ex-Søhn Mønnems. Laif unn im Färnseh hodda midd „Die Passion“ fä Uffsehä gsorgt... Die Leidänsgschischd Chrisdi – im Färnseh? Mit deitschä Popsøngs... Isch weeß jo nädd... Awwa isch muss sagä, sie hawwäs gønz guud hiegebrocht. Wie isch dønn dänn Jesus midd soinä Jinga in de Palmsunndags-Schdroßebøhn gsehe habb – a noch in Essen, schoint’s dess neiä Jerusaläm –, do hawwisch gedängt: Ach du liewa Himmel! Fria, wie unsern singendä Mønnema Heilønd noch nädd gønz durschgedreht war, hedds dess nädd gewwä. Do hodd Mønnem als dess neiä Jerusalem gägoldä. Jetz drehä die Leit dursch, wønn se ä Lied vumm ehemmolischä Rädda ins Musical „Neiduun“, kumm heer, geh fort. Obwohl viel Mønnema mitgschpielt hawwä, hodd die Sach also in Essen schtattgfunnä, komisch, odda? Hodd uns de Herrgott in Sachä Pop sitzä lossä? S’iss ä Kreiz. Abrobbo: So modärn se die Passiøn ah vazehlt hawwä (Mit Tschiinshossä, Bolizei unn äm Pilatus im Øzug) Øm Änd hawwä se doch ä Kreiz gäbraucht, ääns, wo laischd unn dess se dursch Essen gedragä hawwä. Was lärna mir do drauß? Zwealei: Ä gudi Gschischt kriggt nädd ä mol RTL kaputt. Unn: Øhnä Kreiz kä Oschdärn!
Kontakt: kall@mamo.de
URL dieses Artikels:
https://www.mannheimer-morgen.de/kultur_artikel,-kultur-siss-ae-kreiz-_arid,1938861.html
Links in diesem Artikel:
[1] https://www.mannheimer-morgen.demailto:kall@mamo.de