Heer, ihr Leit, wissda schunn s’Neischdä? Mønnem will jetz a noch „Smart City“ wärrä. Schää unn gut – isch bin däfir. Mir sinn jo nädd bloß in de Kurpalz odda im Sidwessdä vonnä, nä, mir sinn vunn vonnä bis hinnä global, wissda wie isch mähn? Mir sinn Bike City, Unesco City of Music, vamutlisch a Cønvärsiønsweltmeischda, werä beinoh Kuldurhauptschtadt worrä, sinn indanazionalä Bausschdellä-Tschämpiäns , Hodellbeddä-Rekordhalda, kriggä die BUGA – unn unsärn Owwabirgameschda wärd vunnde NASA schunn als „Mayor of the Universe“ gehøndlt. Milliardäschwer sinn mir – middä Gosch! Wissda wass ma sinn? Ä Dørf sinn ma! Glaabt da nädd? Dønn fahrä mol sunndags middags middä Elektrisch vunn Härmsäm in die Schdtadt noi, viel Schpaß! Odda ønnaschda: In neun Minudä war isch letzschdäns obänds ä mool vunn Friedalä (fär Noigeplaggdä: Friedrichsfeld) øm Hauptbøhnhof. Vunn dort bis øn de Aldä Meßplatz haww isch dønn ä dreivärdl Schtunn gebraucht. Ä Lachplatt!
Odda gønz onnaschda: Habt da mol owänds um halwa zähnä nooch Theada odda Kønzärt vasucht, in ännä vunn de siewä vornähme Beize um die Berlina Schdrooß was zu dringä, gschweigä denn, wass zu essä zu kriggä? Unn: Nää! Dess war känn Møndaag – unn a nädd im Loggdaun! Ach, ihr geht øbänds nädd so fort? Alla gut. Dønn finnä mol sunndags um vierä mit Kaffeedorschd fußläufisch unn oinischamaße inneschtedtisch äna, der da in unsara Weltschtadt Kaffee unn Kuchä fakaaft. Ah do winsch isch eisch viel weltschdeedischäs Vagniegä! De Herrdegen hodd do nämlisch zu – unn ums Café Flo schdehä se Schløngä biss uff de Ring. Awwa de Hals reggä iwwa Woinäm, Lømbadä odda Grassellebach, do sinnse groß, die Bloomeila. Deshalb ruf isch fer Mønnem än neiä Tittl aus: Mir sinn vor allem äns: City of Dir-bleibts-Maul-sauwa!
Kontakt: kall@mamo.de
URL dieses Artikels:
https://www.mannheimer-morgen.de/kultur_artikel,-kultur-m%C3%B8nnem-iss-ae-d%C3%B8rf-_arid,1933227.html
Links in diesem Artikel:
[1] https://www.mannheimer-morgen.demailto:kall@mamo.de