Heer, hool da selwa än Hund!

Ihr wissd jo, dass isch alsämol vunn Bekønndä de Hund nämmä du, also wønn die in Urlaub odda sunsch irgändwie førd sinn, wosänn nädd midd hie nämmä kännä. Mir zwee, also der Daggl unn isch, ma vaschdehä uns subba. Hugo heeßda unn heerd uffs Word. Wønn isch ruf: „Hugo, kumm heer, odda nädd?“ Dønn kummda heer odda nädd. Midd ønnara Leid kännä mir nädd so gut, de Hugo unn isch. Iwwahaupt sinn mir zwee unns ziemlisch ähnlisch. Der schpielt nädd gärn, isch kä Gsellschafds-schpielä, er nädd midd Schdeggä odda Schdoffbibbelinn unn so Krøm. A dess bei Mänsch unn Tier so beliebdä Hobby, irgänd so äm bleedä Ball noochzurännä, dess lähna mir beidä aus Nivoo-Gründä ab! Mir brauchä kää Bescheffdischungstherapie, blooß frischi Luft unn ä bissl Auslauff, mol a Kaniggl-Loch odda ä Eischhärschä, mehr nädd. Treffä mir uff ønnarä Leit sinnma vorsischdisch, ma weeß jo nie. Also isch mähn, wolldä Sie sisch do vunn jedäm vunn hinnä unn vonnä bäschnubbärn unn vollsabbärn lossä? Ewä, de Hugo nädd unn isch a nädd. S’neggschdä iss: S’gibt jo bekønndlisch unna Menschä gänug bleedä Hundä.

Wehränd der sich schunnschwo øschnufflä lossä muss, muss isch misch vollkwatschä lossä: „Än Daggl, gell? Wie alt issa dønn? Ja, ja, die Daggl hawwä ihrn eigänä Kopp. Die Nochbarsleit vunn moinä Schwegarinn ihra Nischdä hawwä a mol so äna khappt, dess war awwa än Kocka-Schponiel. Iss dess ä Rüdin?“ Ehrlisch, mir falld do als nixmeh oi. So frieh odda schpeet kønn isch ga nädd Gassi gehä, dass sisch so Begegnungä vunn de driddä Art vermeidä lossä deedä. Isch habbma iwwalegt, das isch kinfdisch entschpräschend bleedä Øntwordä geb. Uff Uvaschämdheidä wie „Der hodd awwa kørzä Bäschä!“ kummt ab sofort: „Sie doch a – unn krumm sinnsä aanoch, gell?“ Uff „Der iss awwa gønz schää beisommä!“ sagisch: „Komisch gell, däbei frissda wänischa wie Sie!“ Unn uff: „Fünf Johr ärschd? Sieht awwa elda aus!“ beänd isch dess Gschbreesch midd: „Do issa jo bei Ihnä in beschda Gsellschaffd!“ S’Beschdä awwa, wass sagä kønnsch, iss: „Weesch wass, hool’da selwa än Hund! Donn weesch, wass isch mähn!“

Kontakt: kall@mamo.de