Sollsch jo nimmi in die Schtadt, also noi in die Mønnema Kwadradä. Also schunn, awwa bloß noch middäm Rad unn zum Kaffeetringä – unn neiadings a zum Turnä! Schtatt Parkpletz hamma jetz „Parklets“, do krigg isch schunn allä beim Wørt Blutdruck. Wass solln dess heeßä? Also „Let’s park“ heeßts beschdimmt nädd, so viel weeß isch. Isch glaab jo, dess kummt vunn „Briketts“, weil se do jo wo iwwarall so viel länglischä Plastik- unn Schtahl-Keschdä hieschdellä, damit de nimmä middäm Audo parkä kønnsch. Nädd dassa misch falsch vaschdeht, isch selwa war schunn dreißisch Johr nimmi middäm Audo in de Schtadt. Unn isch habb wedda wass gegä Kaffee, noch gegä Griepflønzä, Fahrrädda odda Außägaschtronomie oizuwännä.
Awwa løngsøm drehä se hald dursch die Herrä unn Dømä Dezernändä midd ihrä iwwazwärschä Ideä. Dassä jetz a noch dännä Fitness-Schtudios in de Kwadrate de Garaus machä, iss doch allahønd. „Calisthenics“ – noch so ä härllischäs Wørt – heeßt der Bleedsinn. Do kønnsch dønn im „Parklet“ uff de Kunschd-schdrooß in so äm Plastik- unn Metallkaschdä uff Kunschdrasä Fitness-Iwungä machä, während die onnarä Leit newä drø Feddabeddä, Blummä odda Tee kaafä odda in de Sex-Schop laafä. Isch glaab als s’geht los! Schport macht ma im Varoin, in de Hall, uffm 48er Platz, im Wald odda im Park – awwa doch nädd uffm Bedong in de Kwadraadä! Die hawwä Ideä! Dä änzischä Schport, der wo mir do oifallt, heeßt „Dävulaafä“. Isch saachs nochämol: Dess iss känn „Verkehrsversuch“ dess iss änn Vakehrtvasuch! Awwa uff misch heert jo känna...
Kontakt: kall@mamo.de
URL dieses Artikels:
https://www.mannheimer-morgen.de/kultur_artikel,-kultur-kaenn-schport-im-kwadrat-_arid,1981888.html
Links in diesem Artikel:
[1] https://www.mannheimer-morgen.demailto:kall@mamo.de