Geht dønzä färs Klima!

Neilisch hawwisch drinn øgerufä, bei dänna Brida vunn de Zeidung! Ja, gänau bei derä Zeidung, die Se in de Hønd haldä. „Saacht ämol, wollt ihr unsaäna fär bleed fakaafä?“ Øn de Zentral hodd die arm Fraa ga nädd gewisst, wass isch will odda woriwwa isch misch uffreeg. Die Rädd iss vunn ännarä Klima-Seriä zum Thäma Kuldur unn Noochhaltischkeit. Än gewissa Spindler schreibt dess. Der will ma allän Ärnschdess jedi Woch wass ønnaräs vormachä. In Berlin sollä Gotlønd-Schafä uffm Dach vunn de Max-Schmeling-Hall grasä. In Hømburg deedä junge Leit bei Konzerdä uff Fahrädlinn schdromplä, damit die Faschdärga unn Boxä Saft hawwä. Odda – noch bessa: S’gääb Disgothekä, tschuldischung „Clubs“, wo dess Huppsä uff de Dønzflesch Schtrøm erzeigä deed – unn die Kerwawärm in Erdlescha gspeischert wärrä deed. Unn ausm Køndenzwassa øn de Deck – vum Schwitzä – deedesä Schpielwassa fä die Toleddä machä! Der denkt, mir sinn all dabbisch, der Spindler!

Hawwischäm øgerufä. Dess wer alles wohr, wassa gschriwwä hädd, hodda gemähnt. Unn hodd ma noch än Haufä onnaräs Zeig fazehlt. Am Änd hawwä ma uns dønn gønz gut unnahaldä, der iss ga nädd uklor. Jetz frog isch awwa eisch: Wønn dess alles schunn geht, warum machämas dønn nädd? Gugg disch mol in unn uff unsarä Bedong-Fawaldungsburgä um! Sucht ä mol in Mønnem uff Wohnbleck ä begriendäs Dach odda Solarpaneelä. Selbscht bei de Neibaudä iss die Sach do reladiv iwwaschaubar, unn selbsch im hippschdä Konwärsionsvärdl kønnsch disch bloß wunnern, wie wänisch vunn dännä neiä Teschniksachä do im Oisatz sinn. Isch habb do Fordarungä: Nädd in, sondärn uff jeden effendlischä Bau än Hømmel zum Grasä . In jedän Club so än neimodernä Dønzbodä, unn Wassaschdoff in jeden Benz! Brauchts do die Grinä unn „Fridays for future“ däzu? Hä? Isch mähn, do deed middlaweil soga de gsundä Menschäfaschtønd reischä, odda nädd?

Kontakt: kall@mamo.de