Durschblick øhnä Brill

Mønschä hawwä äfach vunn Nadur aus de Durschblick. Isch weeßda a nädd, wie die dess machä, dassä so schlau sinn unn in alläm Bscheid wissä. Isch froog dønn als: „Hawwä Sie dess gelesä?“ Ob dønn vunnäm Buch, äm Pardeiprogrømm odda de Hausordnung die Rädd iss, dess schpielt jetz kä Roll. Meischdäns iss die Øntword dønn – Owacht! – „Nä, awwa...“, do weeß isch dønn schunn Bscheid. Isch binn haldämol nädd so schlau unn mussma als Sachä durschlesä. Damit isch beim Lesä de Durschblick krigg, brauch isch – ma iss hald schunn løng in so äm Alder – ä Brill.

Was heeßt ä Brill, siwwänä sinns middlaweil. Weil misch de Aagäarzt unn die Optigärn midd derrä Gleitsischtbrill øm A..., äh, also weil dess nix iss fär misch, hawwischma so billischä Lesebrillä gekaaft. Ärschd äni, dønn ä schdärgari, dønn ä ønnari, die im Gschefd bleibt, dass isch sä nädd jeden zweddä Daag fagess, hie unn widda midd hääm zu tragä. Dess hodd sich dønn dehääm førdgsetzt. Jetzad hawwisch äni øm Kischädisch, uffm Nachtdisch, uffm Dischl newä de Kautsch, äni im Høndschuhfach unnsoweida unn sofort.

Isch habb gemähnt, dess werma ä Hilf – unn bessa als dauernd nooch dämm bleedä Ding zu suchä, odda so än Bännl um de Hals zu tragä. Vunnwegelä! Kaum losch disch in de Sessel plotzä, greifsch neewä uffm Dischl ins Leere, siggschsä driwwä uffm Essdisch liggä, die Brill. Schdehsch uff, laafsch hie – isses die fakeehrd! Die geht fä ä Buch, awwa doch näd färs Fernsehprorømm, Mønn!

Alla niwwa in die Kisch, a wo issän die Kischäbrill jetzwidda hiekummä? Die Brill vumm Schlofzimma kehrt mo gscheit gebutzt, do hawwisch jetz awwa kä Zeit däzu. Liegtse im Bad, die Brill vumm klänä Dischl, wo känn Mänsch weeß, wiese do widda hiekummä iss. Wass macht dønn die im Bad? Isch meschd alsä mol wissä, wer mir die Brillä imma in de Wohnung rumfaschdeggld! Wønn isch dänn finn, iss awwa wass los! Wie gsacht, onnarä sinn a øhnä Lesä schlau. Die missä fer de Durschblick näddämol vunn de Kautsch uffschdehä – ach wass hawwä dies gut!

Kontakt: kall@mamo.de