Ihr Leit, iss Eisch a schunn uffgfallä, dass die Leit bei uns do als so kømisch räddä? Nää, isch mähn also nädd so normal, wie mirs schpreschä unn isch eischs schreiwä du. Nää, isch mähn rischdisch kømisch, nädd bloß Hochdeitsch. Midd so kømischä neimodernä Werda, die wo ma bei uns eigändlisch nädd benutzä deed, a wønn ma se faschdehä kønn. Junge Leit, durschaus a welschä, die vunn do schdømmä, redda zum Beischpiel vumm „Späti“, also vumm faniedlischte „Spätkauf“. Dess klingt so schä nach Berlin, gell?
Ønnaschdwo geht ma „ans Büdchen“. Bei uns heeßd dess awwa nädd so, sondärn Kiosk, Schtändl odda Heisl. Hosch ä Mark vunn de Oma kriggt, bisch „zum Schtändl vor“ Brausäschteebschä, Kaugummieis odda Pänning-Gutsl kaafe. Oder sie hodd gsacht: „Männl, schpring ma mol schnell vor øns Heisl unn hol ma ä Schachtl Schtreischhelza, die hawwisch heit morgen beim Konsumm fagessä.“ Nadierlisch hoddse di Schtreischhelza nädd zum Raachä, sondärn zum „Oischierä“ fä de Kohlä-Offä, gebraucht. Dess iss hald a schunn løng heer... Nadierlisch iss beim Heisl a die Rischdung wischdisch. Ob ma øns odda uffs Heisl geht, iss also än himmelweida Unnaschied...
Unnsa hippä Kurpalz-Berlina fahrä a nädd äfach midd de Schdroßäbøhn odda mit „Buss unn Bøhn“, nää die fahrä middäm Elektro-Roller zum Späti, hole sisch „Tickets“ unn fahrä „mit den Öffis“ – unn mähne domit de effendlischä Personänohfakehr. Färz! De Kall, dess konn isch fasischärä, kaaft weidahie øm Schtändl soi Fahrschoi – unn rumpelt middä Elektrisch „noi“. Dodemit, zur Akleerung fä jungberlinerische Mønnema, sinn donn die „Quadratis“, also die „Schtadti“ gemähnt. Mønn, mønn, mønn...
Kontakt: kall@mamo.de
URL dieses Artikels:
https://www.mannheimer-morgen.de/kultur_artikel,-kultur-gehma-mol-%C3%B8ns-heisl-_arid,1856279.html
Links in diesem Artikel:
[1] https://www.mannheimer-morgen.demailto:kall@mamo.de