De Kall mähnt: "Wer nix wärd..."

Neilisch wa ma middm Schdømmdisch widda beim Wänna khoggt im „Fagissmeinnischd“, so heeßd die Beitz iwwarischäns, falls isch Eisch unn Ihnä dess noch nädd fazehlt hawwä solld. Dess iss jo, isch gebb’s zu, fä ä Mønnema Kneip, än saubleedä Nømä, weill dess ga nädd rischdisch ausschpräschä kønnsch: „Vergissmeinnicht“ deed jo eigändlisch uff Kurpelzisch schief „Fagissmoinädd“ odda eher noch „Fagessmischnädd“ heeße, dess wer dønn awwa kä Pflønz mehr, also kummt so ä bleedi Mischung wie „Fagissmoinischt“ raus, wønn ma’s dochämol ausschpräschä muss. Im Normalfall gehe mir awwa zum Wänna – unn färdisch.

Dess kummt a doheer, dass de Wänna, wie so monschä Mønnema Wärdsleit, viel rummkummä iss in Schtadt unn Lønd. Brauarei-Fadreeg, Mieterhehungä, Pleitä, Schpielschuldä odda Scheidungä bringä do jo Bewegung in die gastronomømisch Sach unn machä Wärdsleit zu Zugveggl.

Schdømmä duuda ausm „Goldänä Schiff“, de Wänna, also dess hodd vor Urzeidä mol soinä Eldärn kehrt, in de Filsbach noh øm Ring, gegäiwwa vumm Jungbusch, wo domols a noch gschafft unn nädd bloß gsoffä worrä iss – unn die zwee diggä „O“ in „Onkel Otto Bar“ noch fä „oben ohne“ gschdonnä hodd, awwa dess iss ä ønnari Gschischd, iwwa die ma heid a nimmi rädd.

Frieh issm als Wärdssøhn de „Braunä Bock“ in de Filsbach øgebodä worrä, awwa nää, er wollt halt „wass Gscheidäs“ midd großa Kisch, Saal unn Kegglbøhnä... Dønn hodda drei Schportfaoinä in Vorordä unn Umloond durschgemacht, bloß Zierguss unn Umuss khappt – unn iss aldärsgemeeß zurigg ins Beitzä-Format. Der aldä Schpruch „Wer nix wärd, wärd Wärd“ bassd beim Wänna jedenfalls nädd. Jura odda Philosophie hedda schtudierä kännä, bei unsärm Wänna brännd nämlisch Lischd uffm Speischa. Awwa er weer nie uff ä ønnari Idee kummä als Wärd soi zu wollä: „Wo Ønnarä ä Härz hawwä, habb isch ä Zapfølaag unn dursch moi Adern laafd Ureisch!“ Dess iss so, wømma aus ännarä Wärdsfamiliie schdømmt. So Leit finnsch nädd iwwaall! Ma kønn sagä, wass ma will, Mønnem iss un bleibt hald än schdarkä Wärdchafts-schtøndort, gell?

Kontakt: kall@mamo.de