Dess iss nix Neiäs!

Ihr Leit, isch wärrs nädd los, dess Vieh! Isch mähn dess Murml-tier, dess ma nädd ausm Kopp geht! Kennt’da dänn Film „Und täglich grüßt das Murmeltier“? Dess iss ä ømerikønischi Komödiä vunn 1993, middäm Bill Murray unn de Andie MacDowell. Der arme Kerl bleibt kwasi innarä Zeit-Schleif hängä, also erlebta Dag fer Dag de gleischä Dag.

Mittlaweil kumm isch mir in Sachä Färnsehfilm løngsøm a so vor. Kønnsch alla Dag Fernsäh guggä – lärnsch nix däzu unn hosch alles schun gsehä! Wenndä nädd graad alle Øwänd „Report“, „Panorøma“ odda sowass sehä willsch – unn de Lønz ehrlisch g’sacht a nimmi sehä kønnsch...

Krimis vunn Göteborg, Ystadt, Wiesbada odda Venedisch, aus de Brätonje, aus Kroaziä, Sidtirol unn Irlønd: S’gibt äfach nix Neiäs! Ob Dupin, Wallander, Wren, ob Staatsøwalt, Ermiddla odda Gärischtsmedizina – fär misch heeßä die allä bloß noch: „Do gugg, s’Murmltier!“

Bei de Donna Leon ihrm Commissario Brunetti unn beim „Traumschiff“ kønn isch schunn de Text midschpreschä, sooft wärd dess Zeig wiederholt.

Dess muss schoints arg deia gewese soi... Jetz missä mir Simpl uns dänn GEZ-finønzierte Unnahaldungskrøm fuffzäh Jøhr in Dauaschleif øguggä. Um 20 Uhr 15! Zur „beschdä Sändeäzeit“, wie ma friah gsacht hodd, weil se heid „Praimtaim“ heeßt.

Friah sinn die „Tatort“- odda „Derrick“-Widdaholungä uff de driddä Progrømmä geloffä. Dess dunsä jetz a noch, alladings laafä se jetz allä Øbend noch däzu uff äm Ärschdä unn uffm Zweeddä.

S’ wärd hallt alles bessa – außas Fernsäh. Dess hodd’s hinna sisch. „Dess hodd middä EM zu duä“, hodd de Wärnna neilisch zumma gemähnt. Nä hodds nädd! Dess iss alleweil bloß ä dabbischi Ausrädd. Eirer Summapaus, liewä iwwabezahldä Färnseh-Intendøndä, geht’s middlaweil wie de Summareifä: vunn Oschdern biss Okdowa!!!! Wollt ihr misch bleed machä? Allä Johr der selwä Zierguss, awwa wønn dess Murmltier s’negschdä mol de Kopp ausm Loch streckt.... Isch saag’s eisch, isch kønn fer nix garøndierä....

Kontakt: kall@mamo.de