Zeisch im Hausgøng!

Der hodd ä øinähmendes Wesä“, sagtma süffisønt iwwa äna, der alles brauchä kønn. Do-demidd mähntma jemønden, der wänischa durch soi Art unn Weis, soin Carakta fär sisch øinimmt, sunnern jemønd iss, der wørdwärdlisch unn buchschdeeblisch „fä sisch oinimmt“, also uff gut Deitsch mitnimmt – unn oischteckt. Wissda, wass isch mähn?

Øm Biffee iss so änna de Erschdä und beim Rundä-Schmeißä de Letschdä – soferna nädd „ausgeräschänd heid“ friah häm muss. Schaad awwa a! Wønn fär wass gsommelt wärd, hodda „grad“ kä Geld debei, wønn iwwarischä Kuchä verdeelt wärd, hodda awwa „zufellisch“ zwee leerä Tuppa-Schisslä debei … Isch bin mir sischer, so Leit kennt ihr a.

„Die Jugend geht in die Fläche.“ Dess hodd neilisch moin schlauä Lehrer-Nochber gemähnt. Unn isch habb widdarum nädd gewisst, wassa dodämit mähnt. Awwa dønn hodds gschnagglt: Die Rädd war vunn unsarä neie Nochbern im Haus.

Parcours laafe

Die hawwä a ä øinähmendes Wesä, bloß ønnaschrumm; kännsch ä Buch schreiwä: Je jinger sä sinn, umso mehr duun se sisch ausbreidä. Noch kä acht Daag sinnse im Haus, schunn schtehe die Schuh, die Bio-Kischdä, Wassa-Käschdä unn die farregdä Blummäkiwwl im Dräbbähaus, die Klappschdihl unn uffblosbarä Plønschbeggä im Hof. Unn newwädrø fliegä nadierlisch fär jeden Bøngard fünf oigschdabdä Fahrrädlin in faschiedenä Greeßä, Bobbycars, Roller und „Skateboards“ rum. Weggräumä? Wieso? Wärd doch neggsch Johr widda gebraucht! Wønn mir aldä Simbl zum Dräggkaschdä wollä, missä ma schdeigä unn Parcours laafe – unn uns ball än Helm uffsetzä. So sieht dess middäm oinähmendä Wesä heidzudaag aus.

Die mietä heid Dreizimmakischunnbad – unn mähna, s’kehrä sechs Schtock Hausgøng, Kella unn dä kømplettä Hof ahnoch däzu! Wadd narrä, wønn zu dännä acht Kinnawägä im Dräbbähaus dämmnegschd noch unsa Kriggä unn Rolladørä däzukummä, wärd de Genaratiønäfadrag uffgekindischt!

Dønn fiehrt die Platzøngschd zum Fläschäfadeilungskømpf! Bassdma narrä uff! Bebybuuma uff die Barrikadä! mähnt Ihne Ihrn Kall

Kontakt: kall@mamo.de