Mannheim. Wies’ iss, so issäs nix. Ob de Winda Zäh zeigt unn midd Klirrrä dursch die Gegänd geht odda „zwischä de Johrä“ schunn lauä Frihlingslifdschä wehä, wønn de drøø bisch, bisch de drøø. Middä Gripp odda Corøna odda beidämm. Isch kumm do nädd so kla. Dess Corøna braucht’s joo schoint’s eha kalt. Die onnarä Virä wohl eha bissl wärma. S’iss ma egal, isch bild ma oi, dass isch øfällischa fä die Bibbs bin, wønn’s draußä vor de Zeit so ä nassi Friehlingswärm hodd. S’iss awwa eh egal: Alle Daag haud’s ään ønnarä Kolleesch vumm Sessl, Gribbäwell odda Corøna, heeßd’s dønn. Wønn die odda dess iwwa disch kummt, machschde nix mehr. Do kønnschdä Gudsl schlotzä, biss de Salbei-Grien bisch. Odda Hihnabrieh dringä, bissda Fliggl wachsä – midd soäm Infekt iss nädd zu schbassä.
Newsletter "Guten Morgen Mannheim!" - kostenlos registrieren
Awwa Änagie sollsch jo a schbarä, fers Klima unn de Geldbeitl – unn nadierlisch a gegä die Russä. Unn schunn hoschd widda die schänschdä Diskussionä: „Heer, dohin is kalt!“, „Ach wass“, sage die Ønnarä, „dohinn iss ä Hitz!“, „Isch weeßda ah nädd, isch frier heid so vunn innäraus“. Dess iss jo eigändlisch schunn widda dumms Gschwetz, weil wass soll dønn do vunn drinnä, wo 36,5 Grad odda soga 39,5 Grad herrschä, nooch draußä frierä? Awwa trotzdämm wees jeda, welläs Gfihl gemähnt iss.
„Du da änn Debbisch ins Bett“, sagä monschä. Odda a: „Drink ä heeßes Bier unn schwitzäs raus.“ odda „Du musch inhalierä!“ Middä Tipps unn de gudä Ratschleeg issäs wie midd Gripp odda middm Wedda: Wies’ iss, so issäs nix. Alla dønn, gudi Bessarung!
URL dieses Artikels:
https://www.mannheimer-morgen.de/kultur_artikel,-kultur-de-kall-maehnt-wass-ae-kaelt-_arid,2039787.html
Links in diesem Artikel:
[1] https://www.mannheimer-morgen.de/service/epaper.html