Unn? Habda eisch wass vorgenumä? Fers neiä Johr, mähn isch? Dess machä jo vielä, gell. Wønn isch persänlisch awwa ääns hass, dønn isses, wønn misch ähna zwischä de Johrä frøøgt, „Kall, wass hoschda dønn fers neiä Johr vorgenumme?“ Do sagisch dønn bloos „Weidamache – mehr nädd!“ Als ob dess wass bringä deed, øm ärschdä Jønua pletzlisch nimmi zu rachä, die helfd zu esse unn allä Dag in so ä bleedäs Fidnässschtudio odda durch de Rhøinauer Wald zu rennä. Heer ma uff, wass änn Hummbug. Nadierlisch iss wännischa essä unn nädd rachä bessa fer dä Kärwa. Ihr wissd awwa hoffändlisch: Dess heebd eh nädd løng midd dännä sogenønndä „gudä Vorsetz“. Mir hoddmo änna erklehrd, der sich ausgekännd hodd, weil a siwwä Johr im Café Løndes, also im Kascho hinna schwedische Gadinä in de Løndäsjuschditzvollzugsønstalt im Herzogäried gsessä hodd, dass „Vorsatz“ änn Schdroofdaadbeschtønd wer. Jawoll! Wønn’s also nädd schunn kriminell wer, deeds sowisso verboodä kehre. Allso bessa Owacht gewwä middäm Vorsatz, gell?
Wie isch ma s’ledschdä mol was vorgenummä habb, iss a in die Hossä gøngä. Isch wolld mehr naus øn die frisch Lufd. Dass dess nädd so geklabbd hodd, is ma donn sellemools iwwa Wøinachde uffgfalle. Dønn hawwisch misch beeild unn war vumm zweedä Faiadag bis Silweschda faschd uunnabrochä uff ännarä Bønk im unnarä Luisepaag ghoggd – unn hinnaher zwee Woche midd de Bibbs im Bett geleege.
Ihr seht, ihr Leit, heerd uff midd dennä gudä Vorsetz, hinnaher kummsch noch in de Knascht odda werschd krønk...
Kontakt: kall@mamo.de
URL dieses Artikels:
https://www.mannheimer-morgen.de/leben_artikel,-ansichtssache-de-kall-maehnt-gudae-vorsetz-_arid,2035536.html
Links in diesem Artikel:
[1] https://www.mannheimer-morgen.demailto:kall@mamo.de