Monschmol hawwä die Leit jo Ideä, gell? Fär misch, dess gewwisch zu, kehrt des „Urban Gardening“, s’muss jo heit alles Englisch soi, also „Städtischäs Gärdnern“ zu dännä komischä Ideä. Schä iss dess nädd – also moina Øsischd nooch. Wo friah ä zumindescht leidlisch gepflegdi Rasäflesch zwischä zwee Vakehrsinslä war, sieht’s heid buchschdeeblisch aus wie Kraut unn Riewä. Die Leid, die dess machä, kennä jo a ga nädd rischdisch gärdnärn – sunschd heddä se jo än Schrewagaddä.
S’neischdä iss jo awwa jetz, dassä øføngä wollä, uff de Friedheef Tomadä zu ziehä. Øgføngä hawwäs die Estreischa, also genaua die Wiena, die jo bekønndlisch øhnähie ä komischäs Vaheldniss zum Dood hawwä. Wønn dess bei uns øføngt, also isch mach nädd midd! Isch mähn, wass soll dønn dess gewwä? Die Dondä Lissl gibt die beschdä Kollrabi unn de Fadda de beschdä Feldsalat, odda wass? Dess iss doch gschmacklos, so wass! Unn nädd blooß øm Volksdrauadaag! Die gønzä iwwakøndiddeldä Schtadtraumbepflønza sollä liewa mol ihr Grewa rischdä, s’Unkraut robbä, de Schdää abweschä unn ä paar gscheidä Blummä druffmachä, do brauchä die iwwa Bio-Gelwariewä uffm Käärschhof nädd noochdengä! Ma hedd nie gedenkt, dass änn die Zeit mol so oihoold: Pletzlisch erschoinä äm monschä Sachä inn äm gønz ønnarä Lischd. Also isch froog kinfdisch besser nooch, wønn’s heeßd: „Der guckt sisch die Radiesl vunn unnä ø.“ Bischda sischa, hawwä dämm soi Kinna dess Johr kä Tomadä druff?
Kontakt: kall@mamo.de
URL dieses Artikels:
https://www.mannheimer-morgen.de/leben_artikel,-ansichtssache-tomadae-uffm-kaeaerschhof-_arid,2014898.html
Links in diesem Artikel:
[1] https://www.mannheimer-morgen.demailto:kall@mamo.de