Ma iss jo bei monschä Sachä als hie- unn hergerissä. Dess Änaseits unn Ønnaraseits kønn än gønz schtruwwelisch machä. Mir hodd neilisch änna vazehlt, dass die Schtadt Mønnem Leit, also Eigänntima in große Wohnkomplexa, beischpielsweis äm Collini Center, øgschriwwä hedd, der dagäweisä Unnavermiedung, also neideitsch „Airbnb“, doch biddä Oihald zu gebiedä. Die Wohnungsbsitza sollä liewa regulär vamiedä unn somidd bezahlbarä Wohnraum schaffä! Dess iss jo änaseits wohr, ønnaraseits bischd froh, wønn inarä ønnarä Schtadt mol ginsdisch ä paar Daag unnakummschd, ohnä in ä Hodell zu missä. Awwa sagämol, hodd die Schtadt nädd selwa, beischpielsweis fer ihrn schtedischää Eigäbetrieb Nationaltheada, oinischä Wøhnungä „bedarfsweis“ im Collini Center øgemiet? Kømisch!
Die Sozialdemokradie iss doch hald imma fer neiä ginsdischä Wohnraum im Oisatz, gut gebrillt roda Löwä! So iss räschd. Awwa Momentämol, iss dem aldä Baubirgameschda nädd uffm gleichä Geländä soi Teschnischäs Rathaus unnerm A.., also wegfault? Unn hodd die schteddisch Wøhnungsbaugesellschaft, beischpielsweis in de Call-Bänz-Schdrooß, nädd im großä Schdiel Sozial-Blegg abgerissä, um jetzt so schiggä Würfel hiezuschdella, wo normalä Leit kaum, awwa heha gschdelldä Bau-Vawalda durschaus wøhnä kännä? Kømisch alles, wie gsacht, ma iss als hie unn heergerissä, beim Prädischä , zwische Woi unn Wassa...
Kontakt: kall@mamo.de
URL dieses Artikels:
https://www.mannheimer-morgen.de/leben_artikel,-ansichtssache-woi-unn-wassa-_arid,2012418.html
Links in diesem Artikel:
[1] https://www.mannheimer-morgen.demailto:kall@mamo.de