De Wolle macht dess schunn!

Mänsch nädd, s’deed løngsøm Zeit wärrä, dassdä hääm kummsch?“, hodds øm Telläføn kheeße. „Ha-joo“, mähnisch, „awwa dess liggt hald nädd in moinarä Hønd, wønn die Reha rum iss, gell.“ Die Zeit bei de Friese in Norddeitschlønd iss jetzt awwa a løng gänuug. Die Kolleschä babblä nadierlisch a schunn bleed. Dess wer ma ehrlisch gsacht egal, gell, awwa dähääm unn im Gscheffd iss hald alles liggägäbliwwä. Wie’s halt so iss, die Poscht, die Bønk, die Schdeier, geh ma ford... Awwa ehrlisch gsacht: Isch habb ma ä bissl schwer gedøø middäm Abschied, schließlisch war isch do drowwä joo a missionarisch unnawegs.

Wass im Färnseh „Ein Bayer auf Rügen“ keeße hodd, hab isch jo selwa mitgämacht, „Än Kurpelza uff Eiderstedt“ sozusagä. Isch mähn die Leit do kønnsch jo nädd allää lossä, die kummä uff die dollschdä Ideeä! Stolpern übern spitzen Stein, „Boßeln“ midd Eisäkugglä iwwa de Deisch, weil se schooints drinnä kä Kegglbøhnä hawwä. Unn’s dolschdä: Hønglä sisch an løngä Schdeggä iwwa ihr Siele unn feischdä Wiese unn heeßä dess „Klootstockspringen“ – soviel Løngweil musch ärschdmo hawwä! Isch mähn, die brauchä doch Hilf, die Leit!

Wie isch mit moinä finschdarä Gedøngä unn moim Haaggäbuddä-Tee zum „Abendbrot“ schleisch, heer isch wass, gønz hinnä im Schpeisesaal. Än Riesling-Bass zwar, awwa fer misch klingts sießa wie än Woihnachtsängl! Zwischä Dellageklapper unn Gebabbl ... än Pelza. Än Kurpelza? Nooch fünf Minuddä iss die Sach klar: Øm Daag zuvor issa økummä, de Wolfgøng, de Wolle vunn Wørmms. Wass änn Segä, die ständisch Fatredung der rhoihessisch Kurpalz iss gewehrleischd! Isch kønn beruhischd häämfahrä! „Wolle“, saag isch bei Schdaffeliwwagaab vumm Missionsufftrag, „du machsch dess schunn!“

Sehda, ihr Leit, alles hodd ä Änd bloß die Wørschd hodd zwee, nädd bloß in de Palz. Wønns øm Schänschdä iss sollma uffheerä. Dess gilt färs Kurä – unn a fä

Ihne Ihrn Kall

Kontakt: kall@mamo.de