Mir Kurpelza sinn nädd gärn allä, so viel kønn ma sagä, dess iss gsetzt. Dess schpielt nadierlisch graad im Johr 2022 ä großi Roll. Dass ma zu zwedd wännischa allä iss, dess iss nadierlisch kla. Vielleischd iss dess dä Grund, warum mir øn Rhoi unn Negga gänn zu zwedd uffdreedä, also a schproochlisch. „Mir schdellä uns heid widda ø wie die zwee Dabbischä vunn de Gschärrmess!“ Wass besagdäs Duo soinazeit, also vor lønga Zeit uff de Maimess, also „der Geschirrmesse“, øgschdellt hodd, weeß heidzudaag kään Mänsch mehr. Dassä sisch hald dabbisch øgschdellt hawwä, dess iss wänischdäns iwwaliefert. Weshalb ma biss heid vunn dännä Zwee rädd, wønn ma sisch bleed, dabbisch, umschtändlich, uugschiggd ewä, øschdellä duud. Dodäbei wärd nadierlisch viel gelacht unn gegiggellt, gell, weil ma jo bei uns Gottseidønk nädd blooß iwwa ønnarä Leit, sunnärn a iwwa sisch selwa lachä kønn.
Do härrscht sozusaagä ä schdilli Iwwaoikunft, gell. Harmønie gibt’s awwa a, wønn die Sach guud laafd, wønn ma alläs rischdisch gemacht hodd – unn øn äm Schdrøøng zieht. Zufriedä klopptma sisch dønn uff die Schulda: „Zwee Dabbischä – ään Gädøngä!“
Kontakt: kall@mamo.de
URL dieses Artikels:
https://www.mannheimer-morgen.de/kultur_artikel,-kultur-de-kall-maehnt-zu-zwedd-iss-schaenna-_arid,1924313.html
Links in diesem Artikel:
[1] https://www.mannheimer-morgen.demailto:kall@mamo.de