Kinners, ihr seid jo varriggt! Øgerufä habbda, gemailt, gschriwwä unn a gfaxt hawwa vielä vunn eisch. On misch, on unsa Segrädariat unn a on Kollgegä: „Wo bleibtn de Kall?“ hodds imma kheeßä. Moi Øntwort: „Im Bett, woa hiekehrt!“ Nädd weil isch mied odda faul wa, misch hodd äfach ä Gripp umkauä, „Influänza B“ hoddse kheeße, dess Dreckmänsch vunnarä Gripp. Normalweis schreib isch jo meischd schunn wass vor, wønn isch weeß, dass isch in Urlaub bin, nädd däzukumm odda fä moi Bleddl wo hie muss. Die Sach ging dessmol so rasänd schnell, do wa midd „Vorschreiwä“ nix drinn. Innahalb vunn fünf Minudä habb isch nix mehr zu mähnä khappt, aus die Maus, flach hawwisch gelegä, isch arma Kärl, äh Kall.
In moim Fiewa-Wøhn hawwisch nachts zwar als Ideä khappt, awwa øm neggschdä Morgä, habb isch misch nimmi entsinnä kännä... Däbei bin isch doch ga känn Bundäskønzla, wo Gedächtniusliggä unn Visionä normal sinn. Schtatt moinä Tassdä hawwä ma dønn leida bloß die Zäh geklabberd.
Awwa genug gepienst, isch bild ma nädd oi, dass isch die Sesong dä änzischä wa, dänns hiegelegt hodd. Awwa jetz iss widda gut: Isch bin widda do! Mir wa wischdisch, misch heit ärschdä mol zu bedongä, fä eia Nochfrogä unn vorsischdischä Genesungswinsch. Macht eisch kä Sorgä. Frei nooch Lotti Huber kønn isch eisch vasischarä: „Die Zitrøn hodd noch viel Saft!“ Unn um bei Obst unn Gemies zu bleiwä ruf isch eisch unn vor aääm allä Maladä zu: Glaabtma, s’geht rum! „Imma hoch die Gelwarieb!“ Bis neggschd Woch
Kontakt zum Autor: kall@mannheimer-morgen.de
URL dieses Artikels:
https://www.mannheimer-morgen.de/leben_artikel,-ansichtssache-de-kall-maehnt-in-eigaena-sach-_arid,2179311.html
Links in diesem Artikel:
[1] https://www.mannheimer-morgen.demailto:kall@mannheimer-morgen.de