Bumm, batsch, päng! Midd Karacho geht’s øm Sunndaagøbend widda innä neiäs Johr. Ma kønn jo bloß – wie allä Johr – hoffä, dassäs bessa wärd wie dess aldä. Isch weeß nädd wie’s eisch geht, awwa in käna ønnarä Zeit im Johr iss so viel vunn Aberglauwä die Rädd wie zum Johräswechsl. Isch saag, „Isch glaab, isch werr morgä mol die Beddä abziehä“ – unn schunn kreischts: „Nää, bloß nädd, bisch du variggt? Doch nädd zwischä de Johrä! Dess bringt Ugligg!“ Ob ma ga nädd weschä därf odda bloß kä großä Deelä, do iss ma sisch unna de Geischda-Froindä schoint’s nädd so sischa. Die änä sagä, Unnahossä unn Soggä därfd ma weschä, awwa ewä kä Hønddischa, Bettwesch odda Dischdeggä. In dännä großä Weschäschdiggä deedä sisch beesä Geischda vaføngä, heeßd’s.
Øn Neijohr, a so wass, muss isch schunn ewisch Sauakraut essä, obwohl isch’s grad dänn Daag ehrlisch gsacht ga nädd so gut vadraag... Dämm Häbbädd soi Fraa hedd awwa gsacht, ma määßds ganädd glei essä, s’misst bloß øm Neijohrsdaag gekocht wärrä, weil’s Geld ins Haus bringä deed. Wønnda misch froogt, habb isch awwa imma gleisch wänisch Kohlä im Geldbeitl. Isch hedd also seit 40 Johr a Schnitzl odda weißa Kees essä ännä, mähn isch, do wersma zumindescht im Magä wohla gewesä.
Awwa kumm heer, geh fort, Traditiøn iss ewä Traditiøn. Deshalb bleibt die Weeschmaschien noch bis zum 6. Jønuar aus – unn isch werrma widda midd løngä Zäh s’Sauakraut nunnawirgä. Wie ihrs macht, dess issma ehrlisch gsacht egal – Hauptsach ihr kummt gut noi! Alla dønn, biss negsch Johr
mannheimer-morgen.de/kall, kall@mannheimer-morgen.de
URL dieses Artikels:
https://www.mannheimer-morgen.de/leben_artikel,-ansichtssache-de-kall-maehnt-bloss-naedd-weschae-_arid,2161624.html