De Kall mähnt: Bøhnfahrä iss ä zugischi Sach

Nix iss jo so schlecht, als dassäs nädd fä irgendwass gut wer“, hodd die Großmudda gsacht – unn domit wie faschd imma Räschd khappt. Neilisch hawwisch ä längari Bøhnfahrt gemacht – odda eha hinna misch gebrocht. Hie unn zurigg in Summä 300 Minudä Vaschpedung. Gut 130 dodävu hab’isch uffm Bøhschdeig vabrocht, isch kønn eisch sagä, dess iss – grad im Winda – ä zimmlisch zugischi Sach. Awwa kä Øngschd, isch føng ganädd ärschd ø middm Zugfahrä, isch schreib liewa ä Buch driwwa – äns midd 30 Bänd.

Isch wollt eisch jo vumm Gudä im Schleschdä vazehlä. Also: Vier Dømä um die sibbzisch, vunn Hoggänä waräse, schdeigä oi. „Entschuldischung, kängdä Sie mir bidde helfä, dänn Koffa do nuff zu duä?“ Isch schnapp’ma dess Kefferlä, saag, „Hajoo, nadierlisch“, unn heebs ins Gäpecknetz. „Der iss jo feddaleicht, hawwä Sie do bloß Schlibba drin?“, sag isch unn dänk, „Ach Gott, was babbelschdn widda!“ Awwa die Fraa wa schlagfärdisch: „Unn alläs bloß Schdring-Tøngas!“ Do hamma gelacht unn isch saag: „Dess habb isch ma gedängt – awwa nädd zu sagä gedraut!“

Was soll isch sagä, iwwa all dämm Gegiggl sinn ma ins Gschpreesch kummä: Uff Dønau-Kreizfahrt sinnse gfahrä – unn wie isch uff Umwegä nooch Passau geirrt, wo se wegä Hochwassa näddä mol uffs Schiff gekännt hawwä, sunnern ärschd mol bloß in de Buss gschdiggä sinn. Vor lauda Babblä weer isch in Würzburg ball nädd ausm Zug kummä. Vaschpeedung hie, Hochwassa her, Humor iss wønn ma trotzdäm lacht – sogaa in de Bøhn...

Kontakt zum Autor: kall@mannheimer-morgen.de