Do zieht’s wie Heschtsupp!“ mault än Kurpelza, wønna im Zug sitzt, also im Luftzug, vaschdeht sisch. Wønndä awwa als uff än eschdä Zug, also änna uff Gleisä øgewiesä bischd, hosch’s bekønndlisch ä nädd gemietlisch. Bsunners, wønn de (noch bisch neggsch Woch) vunn unns aus nooch Frønkford willschd. Odda schlimma noch - uff de Flughafä, also „Färnbøhnhof“ ausschdeigä willschd.
Do bisch näämlisch uffgschmissä unnd kønnsch disch hinnä øm Busbøhnhof schtatt in de ICE in de Buss hoggä. Dess heeßd, dess iss dønn än ICE - mähnt die DB, preislisch zumindäscht. Nädd dassdä mähnt, ma kängt do dønn, weil’s ewä bloß än Bus unn känn Hochgschwindischkeitszug iss, mit soim 49-Euro-Ticket hiefahrä.
Nä, nä, sagt die Bøhn, dess iss kwasi än ICE, der Ersatz-Bus. Mol ehrlisch, haldä die uns fä bleed? Ma kängt’s grad mähnä. Dess iss nädd blooß ä zugischi Øgelegäheit, dess iss ä ausgewachsini Uvaschämtheit, iss dess! Ma braucht mehr wie doppelt so løng, hodd än Umuuß, schteht vielleischd noch middm Buss bei Berufsvakehr im Schtau - unn soll awwa s’Gleischä bezahlä? Isch glaab als, s’geht los!
Fria hodd ma als, wønn äm s’Tämpo zu schnell øgezogä hodd, sagä kännä: „Ä aldi Fraa iss känn D-Zug!“ Unn in dämm Sinn, liewie Deitschi Bøhn rufä ma eisch zu: „Än Buss iss känn ICE!“
Kontakt zum Autor: kall@mannheimer-morgen.de
URL dieses Artikels:
https://www.mannheimer-morgen.de/leben_artikel,-ansichtssache-de-kall-maehnt-ae-zugischi-%C3%B8gelegaeheit-_arid,2167537.html
Links in diesem Artikel:
[1] https://www.mannheimer-morgen.demailto:kall@mannheimer-morgen.de