Wass Muggä!

Schluss, aus, färdisch jetz! Es wärd kääns mehr gessä, zumindescht dehääm nädd. Die Rädd iss vunn Obschd, dämm ach so gsundä . Warum? Jedäs Schdick hawwisch ma im Ladä beim Oikaafä gønz gänau øgeguggt. Gebrieft uff Härz unn Nierä, dassäs nädd øgschlagä, gädetscht, fleggisch, schimmlisch odda sunsch wass iss... Außadäm acht isch druff, dassesma nädd zu løng rummliggd, isch kaaf also a blooß Mängä, die ma dehääm zeitnoh vabutzä kännä. Awwa wass soll isch eisch sagä? Dess Zeig iss noch nädd rischdisch aus de Dasch gepackt, schunn kummä – isch weeß nädd woher – soi Kumpls die Obschdmuggä odda Fruchtfliegä unn umschwirrä disch, bissäs letzschdä Schdick Obschd dänn Haushalt widda valossä hodd. Oigeladä hodd die Viescha känna. Des Obschd bringt die ungebedänä Geschd offäsischdlisch midd ausm Subbamaakd. Isch kønnma schunn vorschdellä wie dess laaft: Uffm Bønd øn de Kass ruft dø so än Appl fresch nooch hinnä: „Heer, Freundä, auf, kummt midd, doo bei dämm Dabbischä dehääm kennama ferummä feierä unn unns schää vamehrä! Bschdimmt schdeht do bei dämm a noch än Woirest in ännara Flasch, odda ä weschi Zwiwwl mit ’ner weichä Schdell – dess verleiht unserm Muggäfeschdl noch ä gewissä Schärfä!“

Wocheløng sinn se dønn um disch rumgschwirrt, nix Essbaräs hodd ma a bloß drei Sekundä uabgädeckt schdehä lossä kännä.

Normalweis war dønn awwa irgändwønn im Härbschd Schluss middä dänna Viehscha; vaschwunnä sinn se, wie se kummä sinn. Awwa heid? Dess Corøna duud dännä Insekdä schonint’s gut. Mir hawwä morgä dä erschdä Advänt – unn die fliegä ma in de Kisch imma noch um die Walniss, Møndarinä unn Arøschä – dess iss doch nädd nørmal! Schluss midd dännä Muggäfeschdä: „Drosophila melanogaster“, wie du Obschdmugg in Brehms Tierlewä heeßä duusch, vorbei sinn se, doi hønischsißä Zeidä! Frischäs Obschd wärd iwwaschetzt – die Kwalideed vunn Tiefkihl- und Dosäobschd unnaschetzt: Schluss midd Dräggsmuggä – Biggsäpersching øn die Macht! Dess mähnt

Kontakt: kall@mamo.de