Mønnem vornnä?

Mannheim. Es gibt jo, ihr Leit, isch denk, ihr kännd’sä, die ald Gschischd, wie der Schpruch „Mønnem, vornnä!“ entschdonnä iss. Isch will dess a gaa nädd in eepischa Breidä do uffdreeslä , awwa wie’s hald so iss, bei aldä Schprisch vunn friah: Die ähnä sagä so, die ønnarä so.

Feschd steht awwa: Die Moin-Negga-Eissäbøhn iss vunn Heidelberg kummä unn in Friddalä øm Bøhnhof, hodd de Schaffna dønn „Mønnem vornnä!“ gegrischä, weil die hinnarä Wegä sunsch wohi unn die vørdarrä Wegä iwwa Mønnem weida nooch Darmschtadt unn Frønkførd gfahrä sinn. S’gibbt hald awwa a die Variøndä, dass es umgehrt gewesä weer, also dassda Schaffna uffm Bøhnschdeig „Mønnem hinnä!“ gegrischä hedd.

Mir großmaulischä Bloomaila, als die ma in Kurpalz, Kraischgau, Ried unn Odäwald ewä hald geldä duä, heddä dänn Schpruch bewusst umgedreht aus Schbass unn weil ma hald so großä Goschä hawwä – unn viellieschd a ä bissl aus Selbschtironie, ma weeses nädd.

Heidzudaag brauchschdä nädd løng noochzudängä, ob ma vornnä odda hinnä sinn. Mir warä Schpitzreida in Sachä Arweitslosischkeit in Ba-Wü (2008), bei de Prokopp-Vaschuldung (2014), beim Flughafä-Check iss unsa „City-Airport“uffm letzschdä Platz (2018 unn 2022 glei nochämool, yippie!). Ma hawwäs løngsomschdä Finønzømt vunn de gonzä Welt, hawwä die meischdä innaschtedtischä Bauschdellä unn sinn – Trømmlwirwl – seit neischdäm a middä S-Bøhn (2023) deitschløndweit s’allaletzschdä.

Awwa die Gosch reißä ma uff! Isch saag eisch, wies’ iss: Unsa greschdäs Vornnä iss, dass mir woiwwaall hinnä sinn! So gsehe, sinn mir Schpitzä. Odda wie monscha Mønnema (in soina bscheidänä Art) gärn sagä duud: „Wo isch binn, iss vornä!“

Kontakt: kall@mamo.de