Gegä die Dummheit iss jo bekønntlisch (leida) imma noch kä Kraut gewachsä. Wo iwwa all wärdsä also beklagt, die Dummheit, weil se ähm hald øndauernd begegnä duud - unn furschtba uff die Nervä gehä kønn. Beim Begga, im Gschefft, im Schtadion, uffm Rathaus - unn iwwahaupt nadierlisch a viel in de Polidik, do jo’s meischdä. Awwa nirgänds wärdse so schää beklagt wie bei uns in Mønnem, die Dummheit.
Wer nämlisch woønnarschda dumm iss, heeßd bei uns dabbisch. Iss des nädd ä härrlischäs Wort? „DABBISCH“ middäm gønz weidä A unn äm kräfdischä unn dobbeldä B in de Mitt unn äm buddaweischä SCH øm Änd.
Bsunners in schäna Wortfabindunge iss mir dess Wort ä Freed: Heer, bisch du dabbisch odda wass? Sag mol, hälsch du misch fä dabbisch? Losch misch do schdehä wie än Dabbischä? Do kännsch dabbisch wärrä! So ä dabbischi Blunns so ä dabbischi! Mir schdellä und heid widda ø wie dabbisch - odda noch schänna - „wie die zwee Dabbischä vunn de Gschärrmess!“
Wass besagdäs Duo soinazeit uff de Maimess, also „der Geschirrmesse“ øgschdellt hodd, weeß heidzudaag kään Mänsch mehr. Dassä sisch awwa dabbisch øgschdellt hawwä, dess iss iwwaliefert. Dess iss bei uns jo a kä Schønd! Weil mir hald wissä, dass sisch jeda unn jedi bei irgendwass, bei bschdimmdä Sachä alsämol dabbisch øschdellt.
Än Dabbscheedl muss bei uns doheer nädd fakehrt soi, dess kønn durschaus än klørä Käll soi, blooß dassa hald ä bissl dabbisch iss, jo alla unn weida?
Dabbisch iss a irgendwie so ä bschdimmdi Art vunn Kurpelza Intelligänz, wissda wie isch mähn? Also de Änglänna zum Beischpiel, der sagt, wønn zwee Leit die gleisch Idee hawwä, dess Gleischä dänke: „Gräjt meinds sink äleik“ („great minds think alike!“) Unn wass sagä mir? „Zwee Dabbischä - än Gedøngä!“ Alla, in dämm Sinn dønn biss negscht Woch...
mannheimer-morgen.de/kall Kontakt: kall@mamo.de
URL dieses Artikels:
https://www.mannheimer-morgen.de/kultur_artikel,-kultur-de-kall-maehnt-wie-die-dabbischae-_arid,1839814.html
Links in diesem Artikel:
[1] https://www.mannheimer-morgen.demailto:kall@mamo.de