Im Härbschd hosch zu duä

Ihr Leit unn Kinna, ihr wärd’s freilisch schunn mitkriggt hawwä: S’iss Härbschd do draußä. Härrlisch isses, wie sisch die Bledda vafärwä, wie ma sisch løngsøm dehääm widda gemiedlisch oirischdä kønn, sisch ä Kärzl øschdeggt – unn vielleischd a schunn änn Debbisch uff die Couch holt. Trotzdäm wa dä Härbschd in moim persäänlischä Kall-Gfihl bisher eigändlisch die uschpektakuleerschd Johräszeit vunn allä vierä. Wie gsacht: wa.

Isch weeß jo nädd, wie’s eisch geht, awwa isch kumm middlaweil nimmi rum. Do gibt’s so Freizeitvagniegungä, die sinn Middlaweil Pflicht, do iss ball mehr Remmidemmi wie im Advent. Isch kumma schunn kømisch vor, weil isch’s vabasst habb Feddaweißa zu dringä. De Zwiwwl- wie de Kwetschäkuchä hawwisch schunn løng vasäumt. A ä Kirbiss-Supp hawwisch bissher a noch nädd khappd. Uff nädd äm vunn hunnert Oktowafeschdä wa isch. Isch binn än armä Käll als Kall. Allahønd hosch hald im Härbschd zu machä. Wehränd ihr in den Palz, beim Wøndern odda im Feschdzelt hoggt, wa isch ønnaweidisch bäscheftischd.

Isch dreh de Schpieß mol um. Isch bin sischa, ihr habd a wass vabasst! Habbda schunn Heizeel bschdellt? Die Heggä nunna gschniddä, s’Laub geräschlt, die Regärinn ausgekehrt? Warda schunn uffm Kärschhof, die Bägoniä runnarømä unn die Erika oipflønzä? Sinn die Summaklamoddä schunn nooch hinnä sordiert? Habbda die Feddabeddä geroinischt, die Balkong- odda Terrassä–Mewl abgedeckt odda in Garaasch unn Kella varoimt? Hä? Do sehtda mol, wassda noch alläs zu schaffä habbd øm Wochäend. Nämmt ma’s nädd iwwl, awwa isch fah in die Palz odda in de Odäwald. Die Bledda sollä so schää bunt soi um die Johräszeit...

mannheimer-morgen.de/kall, kall@mannheimer-morgen.de