De Kall mähnt: Vakehr unn Vasuch

Habbda eigändlisch unnsa Geleschda kehrt, die Woch? Isch mähn de Dunnerschdaag, als die Schtadt Mønnem bekønnd gewwä hodd, dass de Vakehrsvasuch øm 13. März färddisch iss? Uff Kunschtschdrooß unn Fressgass gilt widda: Freii Fahrt fer de Änzlhøndl – unn die BUGA nadierlisch. Do hawwisch midd moinä Kumpls beim Wänna in de Beiz kockt unn ma hawwä gebrillt vor Lachä, wass die sich widda hawwä oifallä lossä. Urpletzlich war uff än Schlag färddisch, was Johrä- unn mønadäløng ausdiskutiert worrä – unn aus 500 unnaschiedlischä Grind nädd gøngä iss. „Isch schmeiß mich ford“, hodd de Häbädd midd soinä fräschä Gosch gemähnt, „wie die sich jetzt dorum windä, wass wønn wie feschdgschdonnä hodd, wie løng die Sach hedd gehä sollä.“ Die Sach – unn a unsa Wärdschafdsdiskussiøn – gehd nadierlich schunn länga, unn mir dischpedierä schunn ä Weil ob die nei Schtadtschpitz ab Summa rot, schwatz odda griin glänzä därf. Ma muss sagä, dass unnsärn Wärd, de Wänna, vunn Øføng ø gsacht hodd: „Männa, glaabt ma: Der wo vunn dänna drei OB-Køndidadä als ärschdes den Vakehrsvasuch abschdellt – der wärd unnsern neggschdä Owwabirgameischda!“ Ich muss zugewää, dass man ausgelacht hawwä, øføngs. „Die CDU hodd Morgänluft gewiddert, unns Ruda rumgerissä...“, sag isch, unn de Häbädd: „Unn jetzt iss die SPD gønz flugs middäbei, damit’nä nädd nooch äm Fahrlachtunnl glei de neggschdä ,Mønnema Drägg’ øm Schuh klewä bleibt!“ De Wänna wagglt middm Kopp, „so løng ma ä Wahl hawwä, hawwä ma a wass zu lachä!“ Woa räschd hodd, de Wänna...

Kontakt: kall@mamo.de