Ma kännt’sä jo, die beriehmt „heiß Schlacht øm kalde Biffee“, die de Roinhard May sellämols so schää besungä hodd. Øm Schlimmschdä isses, so sinn’sä hald ämol die Leit, wønn’s nix koscht. Wänn wass fä ummä iss, heeßd’s: als druff, uff de Della, ob’ s bassd odda nädd, iss dønn egal. Unn isch mähn nädd bloß de Platz uff derrä Platt.
Isch dänk do a øn die Zusømmäschdellung. Mit eigänä Aagä hawwisch schunn gsehä, wie sisch änni Hollännasooß iwwa die Schoko-Muus gschidd hodd, bloß weil änna newa ihrä dänooch gegriffä hodd. Pfui Deifl, saag isch blooß.
Dess neggschdä Problääm midd so ääm Biffee iss de Zeitpunkt. Do hawwä sisch Begga, Metzga, Kondidorä unn Kesch än Haufä Arweit gemacht. Unn Kellna unn womeeglisch noch Florischdä hawwä rummgerøømt unn dekoriert, biss alles schää unn appediddlisch doschteht. So ä Biffee wärd ausschließlisch vumm Gaschtgewwa ereffänt – unn so løng hodd ma die Finga dävu zu lossä. Dess dauert awwa mønschäm zu løng. Alla zopplä se schunn øn de kaldä Pladdä rumm, obwohl teils näddämool alles uffm Biffee schteht, wass do oigeplønt iss.
De Ungl Kallhøinz vunn ännarä Froindin, dess war so ännä. Kaum war de erschdä Kuchä uffm Disch gschdonnä, issa hiegerännt unn hodd sich bedient. Mønschmol hodda sisch aa newädrøø gschdellt unn gewatt, biss wass kummä iss, wass nooch soim Gschmack wa. Uff’s Brautpaa, de Jubilar, s’Gebørdsdaagskind hodda awwa nie gewatt. Dess hodd ma rundum „uumeeglisch“ gfunnä. „Gugg, de Kallhøinz widda!“ hoddma sisch zugebischbert. Awwa sagä hodd ma nix därfa, weil dess än Skøndal gewesä wer.
Noch heit, der Mønn iss schunn zwønzisch Johr døød, iss „de Kallhøinz machä“ im greeßarä Vawøndä- unn Bekøøndäkreis ä gfliggldäs Wørt fä „zu frieh zum Biffee gehä“. Ihr seht, schnell kønn’s gehä middäm schleschdä Ruf. Alla, ihr Leit, bassd ma uff, dassa eisch nädd irgändwønn schprischwärdlisch dänewäbenämmt...
URL dieses Artikels:
https://www.mannheimer-morgen.de/leben_artikel,-ansichtssache-mach-naedd-de-kallh%C3%B8inz-_arid,2255400.html