Bei uns, dess schteht feschd, gibt’s Sachä, die wo’s woønnarschd nädd gewwä duud. Nadierlisch gilt dess, dess weeß isch a, fer vielä ønnarä Rägionä. Dess kummt hald doher, dass jeda mähnt, bei ihm dehäm sei’s am schänschdä. Isses awwa nädd, weil’s jo bei uns am schänschdä iss. Logisch, odda?
Wass isch awwa mähn, iss, dass bäschdimmdä Ausdrigg, also „Redensardä“, nädd ubedingt Schbrischwärda, bei uns bsunnärs zuträffend sinn, also zu gewissä Siduazionä exakt bassä. So klänä Wändungä, die, wønnsä ins Hochdeitschä iwwasetzä deedsch, ihrn Schaam falierä deedä... Ihr wissd alle, wass isch mähn, odda? Wønndä nooch äm Beischbiel suchä deedsch, däängd da beschdimmt kääns oifallä. Meischdäns, heersch dønn pletzlisch äns – unn es geht das Härz uff. Neilisch, wie moin (türkischschdämmischa) Nochber zu soim vierjehrischä Biwl uffm Ballgøng gsacht hodd „Auf, kumm roi jetzad, schaff disch noi!“, war fer misch widda so än Moment. Odda wie die Fraa vumm Schtändl aus ihrm klänä Kiosk-Fänschderlä nausguggt unn zu äm klänä Medelä sagt: „Wass kriggschändu, kläni Grott?“
Die Momendä Kurpelza Seelischkeit bassierä awwa a, wønn’s wänischa härzlisch zugeht. „Isch glaab als, s’geht los!“, heer isch unlängschd äni øm Briefkaschdä beim Blick uff ä uffgerissinä Räschnung sagä. Unn wie die guud Fraa noch: „Dess gibt’s uff kämm Schiff!“ hinnahersetzt, do häddischsä grad knuddlä kennä. Wønn äm in gønz normalä Alldagssiduazionä ä Grinzä iwwas Gsischd huschd unnda s’Härzl iwwageht vor Freed – dønn bischdä dähääm! Des mähnt zumindescht...
Ihne Ihrn Kall
Kontakt: kall@mamo.de
URL dieses Artikels:
https://www.mannheimer-morgen.de/leben_artikel,-ansichtssache-isch-glaab-als-sgeht-los-_arid,1878149.html
Links in diesem Artikel:
[1] https://www.mannheimer-morgen.demailto:kall@mamo.de