Bier trinken, Disco gehen, OB wählen – alles ab 16.“ So schteht’s uffäm Plakat vunn äm Bindniss, dess jungä Leit øm Sunndaag zum Wehlä gehä modivierä soll. Odda, wie die sagä, „Bock uff Wahl“ machä will, wie a die witzischä Plakadä, die se in dä gønzä Schtadt fä die Mønnema OB-Wahl uffghängt hawwä. Isch habb do zwee Sachä nädd rischdisch vaschtonnä.
Gehä die dävu aus, dass die Kinna sowieso allä nimmi rischdisch schreiwä kännä unn „Wahl“ unn „Wal“ ä unn dessselwä iss? Haldä die unnsa Kinna øm Änd fä bleed? Dess soll hald än Witz soi, allagut, moinätwegä. Dess Zweddä iss, dass ma in dämm Uffruf a ä Ufforderung zu ännarä bschdimmdä Reihäfolg vaschdehä kønn: Sie sollä also erschd Bier dringä, dønn in die Disco – unn dønn ärschd wehlä.
Die Wahlhelfa freeä sisch sischa, wønn do glei in alla Herrgottsfrieh Jugändlischä uffschlagä, weilsä kwasi vunn ähm Lokal ins ønnarä fallä. Wahrschoinlisch war dess Plakat awwa ga nädd so gemähnt, sunnern wolld neie Freiheidä ab 16 gschpessisch bindlä. Mir iss awwa bei derä Gelegenheid oigfallä, wie bei uns friah so än Wahlsunndaag ausgsehä hodd. Bier hoddo känna gedrungä.
Dess war känn Sunndaag wie jeda ønnarä, dess war wass Bsunneräs. Ä mords Gehoimnis iss do ums Wahlgehoimnis gemacht worrä. Ma iss do nädd graad so hiegerännt, sunnern hodd sisch gscheid øgezogä unn iss do midd so äm bschdimmdä Birgaschtolz hiegøngä. Mønchmo iss dess noch midd Kirschgøng unn auswärds Midagessä vabunnä worrä.
Die Sach hodd noch än droggä-feierlischä Wert øn sisch khappd. Hodd ma Leit gedroffä, hodd’s kheeßä: „Unn habbdas Rischdischä gewwehlt?“ Unn ma hodd valegä im Kreis gekischärd, unn nadierlisch kä gscheidi Øntwørd kriggd. Wass isch heid eigändlisch middä Wordä vumm Ungl Frønz sagä wolld: „Ihr Leit, ihr habt die Wahl. Geht øn die Urnä – bevora drin liggt!“
Kontakt: kall@mamo.de
URL dieses Artikels:
https://www.mannheimer-morgen.de/leben_artikel,-ansichtssache-de-kall-maehnt-wahlsunndaag-_arid,2095586.html
Links in diesem Artikel:
[1] https://www.mannheimer-morgen.demailto:kall@mamo.de