De Kall mähnt: Hubbsä biss de Atzt kummt!

Unn? Waada schunn draußä? Uff de Buga mähn isch. Unn ja, isch saag „uff“ de Buga, weil ma ewwä uff ä Schau geht, gell. Awwa apropos „uff“, unn „nuff“ unn „owwä“: Kennda eisch noch øn die letschd Bunndäsgaddäschau äinnärn? Do hodds uff de „Freizeitwies“ so ä uffgeblosänäs Ball-Gebirgä gewwä, middäm Netz aus diggä Schdrigg driwwa, zum Nuffkleddärn fä Kinna. „Babbelplast“ hodd dess 1975 kheeßä; ärschd neilisch wa ä Foddo in dä Zeidung. Isch binn vaschroggä! Wie ma sich doch irrä kønn, also wie ään die Äinnerungä doch tøischä kännä! Isch bin do sellämols jo a druff rumgeturnt – unn hedd 100 Mark, äh Euro gewedd, dass die Dinga dunklblau warä und nädd, grien, gelb odda hellblau – unn schunn gaa nädd gelb/hellblau gschdreift! Warrä se awwa, dess kønn ma uffderä Uffnøhm sehä. Unn noch wass, siggschdä do: Mindeschdäns doppelt so hoch warä die Bell domols! In moinä Äinnerung. Wass awwa do drøø liggä maag, dass isch sellwa jo bloß halb so grooß wa wie heit. Unn noch wass: Neilisch, uffäm Kussäng- unn Kussinä-Treffä, dä sogänønndä „Veddärnwärdschaft“, hawwä mass dävu khappt: Ma hodd sisch sauweh machä kännä uff dännä „Barbapapas“, wie die bei uns (nooch derrä Kinnäsändung im Färnseh vunn 1974) hausintärn kheeßä hawwä. Midd Schuh hoddma jo nädd druff gedärfft uff die Dinga, unn so hoschda allä meeglischä Valetzungä zugezogä, Striehmä ønndä Kneschel, umgekniggdä Zehäneggl, blauä Fleggä – awwa dess wa domools nädd so schlimm, dass sich Kinna beim Schbielä weh gemacht hawwä. A iwwa die gifdischä Dämpf vunn dännä in de Sunn doch ziemlich schdingischä Kunschschdoffdinga – bloß in de Multihall hodds noch mehr gschdungä – hodd sisch känna beschwert. Warum ah? In derra Zeit warä die Schulä unn Kinnagärda kwasi allä noch kømplett aus roinschdäm Asbescht gebaut! Ma hodds nädd ønnarschda gekennt.

Blooß wønndä ä Kuggl diefa gfallä bischd, weil greeßarä Kinna owwädruff so rumkhubbst sinn, dass disch hoschd nimmi haldä kännä, iss a monschäs Kind uff de Kopp gfallä, dass soga de Atzt hodd kummä missä. Heid deed ma sagä: Hubbsä biss de Atzt kummt! Alla dønn, schäni Buga noch!

Kontakt: kall@mamo.de