Soball ma laafä kønn, lernä mir a ønnarä Sachä, sagämamol zum Beischpiel wass wischdisch unn wass uwischdisch iss. Odda wass Äldern wischdisch iss. Die Händ vorm Essä weschä, die Hausuffgawä machä, soi siwwä Sachä nädd nur beisømmä, sondärn a in Ordnung zu haldä... so Zeisch ewä. Ärziehung heeßd ma dess, unn die iss nadierlisch a notwändisch. Zu dennä Sachä kehrt a des Thäma Schlissl. „Hosch du doi Schlissl däbei?“ „Hodd jemønd moi Schlissl gsehä?“ „Bass ma uff doin Schlissl uff, wønnänn widda fortschaffschd, iss wass los!“ Moi gønz Lewä binn isch uff Schlissl abgerischt worrä wie änn Dobbamønn. Fagessä unn valorä hawwischsä trotzdem.
Schlissl sinn gut vawahrt worrä, nädd in allä Händ kummä, ugärn noochgemacht worrä unn – domit wer isch beim Thäma – a nädd glei fortgschmissä worrä, wønn ä Schloss ausgädauscht, ä Dier nausgfflogä odda wass uffgewä worrä iss.
Im Ergebnis hawwisch heid än Schiewa volla Schlissl vunn dännä isch nädd weeß, wo se noch hiekehre. Do wollschdä mol ä Øhängalä drø machä – hoschse awwa ärschdemol zwee Mønat uffm Schuhschrønk rumfahrä lossä. Irgändwønn iss a døonn ins Desl, s’Schechdälä odda die Schublaad gewønnert, äfach, dassa mol uff- odda bessa fortgerømt iss, der wischdischä Schlissl. Do liegta jetz mit hunnard ønnarä unn watt uff Schlessa in Dierä zu Heißa, Wohnungä, Garaschä unn Kella, die allä längsch uffgewwä, abgerissä odda ausgebaut sinn. So än Schlissl Friedhof iss ä traurischi Sach. Ma kønn bloß hoffä, dass der Petrus die Sach bessa im Griff hodd...
Kontakt: kall@mamo.de
URL dieses Artikels:
https://www.mannheimer-morgen.de/leben_artikel,-ansichtssache-de-kall-maehnt-gebbma-die-schlissl-_arid,2130958.html
Links in diesem Artikel:
[1] https://www.mannheimer-morgen.demailto:kall@mamo.de