S’iss hald ä mol so, ihr kännd’s allä, dassäm alsämol wass runnafallt. Wo gehowwld wärd, do fallä Schpäh. Wer wass schafft, dämm fallt hald beim Wärglä a wass aus de Händ. Ä Werkzeig, än Kleedabiggl, de dabbischä Kugglschreiwa odda – schlimm gänug – heidzudaag als ewä amol ä saudeiräs Händy. „Wønns nunnafalld, iss die Uhr kabudd.“ Kännd ihr dänn Schpruch? Kä Øhnung, wo dess herkummt, awwa bei uns iss dess gsacht worrä, wønnda uff wass bsonners gud hoschd uffbassä sollä. Also wønn die gudä Porzelløntassä vumm „gudä Gschärr“ niwwa ins Wohnzimma, „die gud Schtubb“, hosch tragä sollä odda so Sache ewä. Mønschmol iss a noch ä „Gell, bassma uff, wesch jo, wønn’s nunna fallt...“ dävorgschowä worrä.
Die Schwerkraft iss jo gänarell ä tiggischi Sach, gell. Jeda wärd sisch do øn soin persänlischä Schpezialfall erinnarä. M’Häbädd iss mol, weila die Händ voll khappt hodd, än Kuchä im Babbedeggl-Kardøng vumm Herrdegä s’Audodach, iwwa die Heck-Klapp, batsch, uff die Schdrooß runna gerutscht. Die Kommuniøn-Tort vunn soinä Klänä hodd dønn ausgsehä wie Metzlsupp – unn soi Fraa hodd vumm Weißä Sunndag bis Pingschdä nix middäm gerädd. Die schä Tort
S’geht nadierlisch a wesändlisch uuschpektakulera – awwa dodefir viel miehsøma: Mir selwa sinn ä mol (fär ä großäs Sunndaagsfriehschdick mit Rihr-Ei) in de Kisch sechs schunn uffgschlagänä rohä Eia sømt Schissl runnageblotzt. Die Glas-Schissl iss immahie gønz gebliwwa. Awwa die schtundelong Schmierarei uffm gebleddeldä Kischäbodä vagess isch moi Lebdaag nädd! Deshalb, ihr Leit, isch saag eisch äns: Uffbassä! Weesch jo, wønn’s nunnafallt ...
Kontakt: kall@mamo.de
URL dieses Artikels:
https://www.mannheimer-morgen.de/leben_artikel,-ansichtssache-de-kall-maehnt-dess-iss-ma-runnageblotzt-_arid,2116913.html
Links in diesem Artikel:
[1] https://www.mannheimer-morgen.demailto:kall@mamo.de