Wønndä als so midddä Leit rädsch, denkschda jo so doin Deil. Also im Schdillä. Øm liebschdä sinn ma do jo die Mønnem-Erklära, die gønz genau wissä, wo’s wie iss in de Schtadt. Welles Färdl fär was schdeht, wo wassfä Leit wøhnä duä, wie die Immobillie-Preisä oizuschetzä sinn – unn so weida unn sofordd.
Frogsch dønn, wosä selwa wohnä, kummd dä Hømma: „In der Schwetzingerstadt“. S’duud ma leed, awwa do kønn isch bloß die Aagä fadrehä unn denk ma: „Kä Øhnung hosch du – unn dovunn viel!“ Än Mønnema wohnt in de Schwetzinga VORschtadt – unn färdisch. Nooch unn nooch hawwä sisch in de Grindazeit, also so um die 1880, die ehemalische Augärddä in ä klassisches Mischgebiet aus Klägewärwä unn Wohnheißa gewøndelt. Do defir war de Bøhnhof unn die Fabrik vumm Lønz faøntwordlisch. VOR de eigentlische Schtadt unn außahalb vunn de Kwadradä, faschdeda, wass isch Eisch sage will. Desadwegä heeßd dess Vorstadt. In Minschä gibt’s die Maxvorstadt imma noch, in Mønnem hawwä unnsa Froinde aussäm Rathaus in ännara (wønndamisch frogd saubleedä) Fawaldungsreførm des Gønzä in de Schtadtbezirk „Oststadt/Schwetzingerstadt“ geordnt. Dess äna Probläm iss, dassä jetzt allä mähne (Die Immobillie-Hoinis schiere die Sach noch ø!) sie wøhnä in de Ostschtadt –dunsä awwa nädd! Die ønna Sach iss, dass die glaawä, wassmanä in de Pass gschriwwä hodd, zumindeschd die Zugezogänä. Wohr isses trotzdäm nädd. Leid duä, kennäse äm. Isch mähn dess iss doch pøinlisch, wønndä nädd ämol weesch, wo do wohnsch, odda? Fer moi Ohre klingt dess so oriendierungslos, als deedäse sage, sie wohne auf dem „Birkenhof“, in der „Parkstadt“ odda in „Aldwestheim“. Fariggt wärre kenndsch doch do!
Ihne Ihrn Kall
URL dieses Artikels:
https://www.mannheimer-morgen.de/kultur_artikel,-kultur-vor-schtadt-heesst-dess-_arid,1629949.html
Links in diesem Artikel:
[1] https://www.mannheimer-morgen.de/orte/mannheim/schwetzingerstadt-oststadt.html