Bildung wärd jo groß gschriwwä do bei uns. Unn dess iss a rischdisch so. Schulä hawwä ma desdewegä jo än Haufä in Mønnem. Die schänschdä däfu schdømmä jo vumm aldä Schtadtbaurat Richard Perrey, der uns so schänä Bildungs-Burgä wie die Pestalozzi-, die Humboldt-, Uhlønd- odda die Lutzäbuggl-Schul uffgschdelld hodd – unn die de Krieg iwwalebt hawwä. Wenn awwa im Allgemøinä unn in de Äzahl vunn de Mønnema Schul gschprochä wärd, donn iss nadierlisch wass ønnaräs gemähnt. Do kummt dønn Musikk ins Schpiel. Die Sach hodd midd so Køndidadä wie Schtømitz, Holzbaua, Rischda odda Cønnabisch nädd in änarä Schul, sunnern im Schloss schdattgfunnä. Die Hofkapell vum aldä Call-Theodor hodd sich soinazeit bekønndlisch zwischä Barock und Frihklassik iwwa die Kurpalz naus in gønz Eiropa än gudä Nømä gemacht. Kreadiv war’sä, die Mønnema Schul, hodd allalei neie Schpielteschnickä und Kompositionsfigurä afunnä. Unn nadierlisch fer dä Hof und inn de gønz Räsidenz fer gudi Schdimmung gsørgt.
Musiziert wärd freilisch biss heid viel in de Quadradä, nädd nur in de Musikkschul odda øn de Musikkhochschul. A in Gsøngfaroinä unn Bloosorckeschda, Kirschäkehr unn Rockbänds wärd in Mønnem gfiddlt, gschrømmlt, gedrummlt und tiriliert. Wønns dønn alsämol nädd gønz so sauwa klingt, sachdma: „Ou, dess is hald die Mønnemma Schdimmung!“ Wissda was dess iss? Gonz äfach: „Dess „a“ stimmt eh nädd – unn dess „e“ ah nädd!“
Alla dønn.
Ihne Ihrn Kall
URL dieses Artikels:
https://www.mannheimer-morgen.de/kultur_artikel,-kultur-m%C3%B8nnema-schdimmung-_arid,1622902.html