Ørufä midd kømischä Numman

S’ gibt jo middlaweil allahønd kømischä Ørufä. Wønndä dähhääm bisch, s’bimmlt, gehsch øns Telläføn, quatscht disch äni voll, die ga känni iss. Also a känn er, sunnern nur so ä kinschtlischi Schdimm aussäm Kompjuda. Hosch was gäwunnä, mähnt’sä, mischd bloß die unn die Zahl uff de Taschdadur driggä, schunn wersch Millionär. Wønn’s bloß so äfach wer! Da ma awwa weeß, dass dess in de Regel bloß useriäsa Nepp niss, drausch doim vermointlische Gligg nadierlisch nädd. Do iss was faul, bisch jo nädd bleed. Letschdänändes, dess wissa ma doch allä, wolläsä doch allä nur doi Beschdäs: doi Kohlä! Awwa nädd midd mir, denksch da – unn hängschd äfach oi. Dønn gibd’s do noch so Ørufä, do schoind dess ä reali Numma zu soi, do will dønn jemand, dassdä ønnarä Umfrog teilnimmsch, „Marktforschung“. A do gilt: Øm End wolläseda doch a widda bloß än subbadubba Tarif fä Schtrom odda Teläføn fakaafä. Nä, awwa nädd midd uns!

S’schlimmschdä awwa, isch weeß nädd, ob’s Eisch ähnlisch geht, sinn die Numman vunn de Fawaldungshochburge. Im Fall vunn Mønnem, Heidlberg unn Umlønd iss dess haldä mol Kallsruh unn Schduddgadd. Ob badischi odda baden-württembergischi Herrschafd.... – do iss de Kurpeza hald nooch wie vor skepdisch. Unn mit was? Midd Räschd! Pensiønskassä, Fasischerungä, Uffsischdsbehördä, Ämda, Berufsgenossäschafdä melde sich nämlisch imma unna der Vorwahl 0711 odda 0721 – unn dä Ärga is domit quasi schunn vorprogramiert. Wønn isch die Zahlä lees, schwilldma schunn de Kømm! Owacht! Do iss Gfahr im Fazug. Unn Schreiwarei, Ausfillarei, Dischpediererei im Øzug! Seid wønn issän fer än Mønnema schunn mol was Gudäs aus Kallsruh odda Schduddgadd kummä, hä? Mir schdeigtda in die Dasch – isch loss klinglä! Isch geh äfach nimmi drø bei Gelbfießla unn Sauschwowä!

Øuh, haldämol, do felld ma oi: Hockt die Loddo-Zentral nädd a in Schduddgadd? Alla, isch habnä jetzt øgerufä. Gsachd hawwischnä, dassä die misch weidahie ørufe därffe! Nädd dass dess Geld dønn aus Fasehä im Kallsruha Fescha odda im Schduddgadda Kessl fasiggad! Imma schä nooch Mønnem iwwaweise, Herr Loddo-Direkda, gell?

Kontakt: kall@mamo.de