Die nei Elekdrisch

Graad geh isch beim Wänna in die Beiz noi, hab noch näddämol „Tach!“ gsacht, do fallt ma de Häbbädd buchschteeblisch ins Kreiz unn schmeißd misch ball um. „Heer, kønnsch du nädd uffbassä?“, fauch ischän ø. Awwa unnsan Häbädd iss wiera iss – unn schießt los: „Do fahrsch’ graadämol middä nei Schdrooßäbøhn, do schmeißds disch um!“

De Wänna øhnt, wass kummt unn mähnt: „Häbbädd, gønz Mønnäm freed sisch uff die nei Elekdrisch unn du maultscht schunn widda!“ „Dess iss jo dess“, machda glei weida, „pletzlisch freet sisch alläs – unn isch weeß nädd warum!“ Unn dønn holda im weidä Bogä aus: Wie dess alläs øgføngä hedd middäm Skoda-Ufftrag unn dass Leit midd Behinnarungä gschännt hedda, wiesä sellämols die ärschd Muschdaschroßäbøhn øgeguggt heddä ... „Unn weida?“, mähnt de Wänna øm Zapfhøhnä hinnä ä bissl genärvt. Øm Øføng, wie bloß äni zur Buga nausgfahrä wer, wäräm bloß uffgfallä, dassä in de Kurvä quietscht wie ä aldi. Unn dass die Holzsitz hart sinn unn ma so bleed druff rumrutschä duud. „Awwa jetz“, holda dief Luft, „jetz hawwisch ma die Sach mol gønz genau øgeguckt. Do drinn geht’s nuff unn nunna, do ä Träppschä, do än Absatz, ...“ Dess wer kä Schroßäbøhn sunnern ä Achdabøhn, mähnda weida, de Häbbädd. Die Haldä-Drigga, ma lachä kørz in aldä Äinnarungä øn dess uraldä Wort „Fahrgasthaltewunsch“, deedä owwä øn de Schdøng hängä unn ma kämt nädd hie. Dodefir kängd ma sisch bei de Drigga newä de Dierä nimmi feschdhaldä ... unn so weida unn sofort. S’Beschdä awwa werä die vier schiefä Plattä, wønnda øn de Dier schdehschd, die roinschdä Rollator-Abschussrømpä! „Weeschd wass, Häbädd? Ich loss ma vunn dir moi ’Krieg der Schdärnä’-Bøhn nädd schlecht machä, fahrsch hald graad middäm Raad, s’iss ä gsinda“, mähnt de Wänna. Awwa de Häbbädd gibt nadierlisch kä Ruh: „80 Schdigg – mit Option uff mehr – hawwäsä vunn dännä Dinga bschdellt! In Pilsen! Die kännä vielleischd Bier – awwa Schdroßebøhn kännä se nädd!“

De Wänna gibt uff: „Wønn isch da fä ummä ä Pils hieschdell, halschd dønn endlisch doi Gosch?“ Schnell unn schtumm niggda, de Häbädd. „Die Welt iss schlecht!“, dänk isch beima, vor alläm do, wo Geiz unn Dorschd zusømmätreffä...“

mannheimer-morgen.de/kall, kontakt: kall@mamo.de