Imma logga bleiwä!

Von 
Rcl
Lesedauer: 
De Kall - Autor unserer Mundart-Glosse. © Walter Imhof

Middäm Fordfahrä isses jo derzeit so ä Sach, gell. Fahrma, fahrma nädd, fahrma im Schpeedjohr odda dessjohr ganädd? Dess sinn die Frøgä, die derzeit øn Kischädischä alle Dag diskudierd wärrä. Die Rädd iss vunn Urlaub odda Kørzreisä. Nooch dämm Schattdaun sinn jo jetz nooch unn nooch Loggarungä oigedredä. Also ma därf fordfahrä, allso so ä bissl, awwa a widda nädd so rischdisch. Wie dämm a soi, mir hawwäs gemacht, uff Berlin is gøngä. Middäm Wänna unn soinä Møni. Leer war’s unn ä räschd schää.

AdUnit urban-intext1

Als ma dønn abreisä wolldä, hamma fä dä letschdä Daag noch im Hodell die Koffa irgendwohie faschdauä misse, weil ma die Zimma jo morgäns schunn hawwä roimä missä, awwa nochmiddags erschd gfahrä sinn. Alla hawisch noch dä Gäpeckuffbewahrung gfrogt. On därrä Rezeption wahre zwee Leit khockt. Die Ä war bäschefdischd, dess Ønnarä war so ä junges Kerlsche, än schpøniä Praktikønt deed isch saagä. Deitsch hodda zwa gschprochä, awwa øgschdelld hodda sisch. Hie unn her issäs gøngä. Irgendwonn sagd der zu mir so was wie: Isch wär än beesä Mønn unn soll mich unnärum mol logga machä. Do bin isch dønn ausgflippt. „Wie räddn Sie mit mir! Wass sinn dønn dess fä Redänsardä? Was falldn Ihnä oi?“ Do schnappt misch vunn hinnä de Wänna: „Dass du trotz Loggarungä nädd logga bisch, heert ma. Der rädd neideitsch Änglisch midda unn mähnt Logga-Ruhm („locker room“), also Schpind odda Schließfescha – unn die sinn im Beesmänt („Basement“) im „Kella – und do kennäma unsa Zeig noischdellä.“

A warum sagda dess dønn nädd, der Hutsimbl, der maulfaulä, wønnma Deitsch middäm rädd? „A Kall, so deitsch war dess a widda nädd, du hosch wennischa vunn Gäpeck unn Koffa als vielmehr vunn ,Rawaasch, Duddä, Krøøm unn Gschdellasch vunn de gønzä Bagaasch’ gschprochä …“ Do muss isch dønn grinzä. „Na wänischäns bei Bagaasch hodd’s beiäm gschnaggld, dess heeßd nämlisch Gäpeck uff Änglisch unn uff Frønzesisch!“ Do sehta: Imma schää logga bleiwä, ihr Leit, uns Mønnema faschdeht ma halt wo iwwaall!

Alla dønn

AdUnit urban-intext2

Kontakt: kall@mamo.de 

Mehr zum Thema

Mundartglosse De Kall mähnt: "Bekønndä Bekannte"

Veröffentlicht
Von
de Kall
Mehr erfahren

Mundartglosse De Kall mähnt: "Schbord iss Mord!"

Veröffentlicht
Von
Rcl
Mehr erfahren

Mundartglosse De Kall mähnt: Sinn imma die Ønnarä!

Veröffentlicht
Mehr erfahren

Thema : De Kall mähnt - Mundartglosse

  • Kultur S’geht widda „nauszus“!

    Ahh, härrlisch! Laue Liftschä wehä, die Temparadurä sinn gschdiggä unn die Clara, also die Sunn, hodd sisch a schunn ørdäntlisch bliggä lossä. So løngsøm wärd’s! Hierzulønd hamma dodefir än herrlischä Ausdruck, der die Rischtung gønz klar vorgibt: Es geht „nauszus“! Unn somit a uffwärts, hoffändlisch. Iwwa des schänä Wärdschä hawwisch schunnämol gschriwwä, dess iss wohr. Dess macht mir awwa nix, dänn „nauszus“ kehrt zu moinä persänlischä Lieblingswärda. Vunn Eirä schproochlischä Lieblingä unsara Muddaschprooch, diedama zugschiggt habt, iss dønn am Møndaag widda in de Zeidung zu lesä. Heit iss moi geliebdäs „nauszus!“ drø, dess, wønnda misch froogt, imma ä Ausrufäzeischä als Hoffnungsschimmer braucht. {element} Mønnschä, unn do hodds unna Lesa schunn Diskussiønä gewwä, sage eher „rauszus“, wass a in Ørdnung iss, mir persänlisch awwa näd so vunn de Zung geht. Falsch isses desdäwegä freilisch nädd, jedda rädd ewä, wieäm de Schnawwl gewachsä iss. {furtherread} Dess Drollischä øn „nauszus“ iss, dass es do ganädd ubädingt waam odda frihlingshaft soi muss. Aa wønn scharfä Windä dursch die Kurpalz wehä und de Friehling soi blaues Bønd noch nädd fladderä lossd: Nauszus geht’s trotzdem, weil’s ewä länga hell iss. Weil hier unn do wass Grienäs uffblitzt. Unn unnsa gudi Induschtrie-Luft gønz onnaschda rieschd. Nooch Schoklaad, Bier, Kokkosfett, Zellschdoff, Grillfleesch unn Seefäpulva rieschds jo do s’gonz Johr. Alla dønn, geht jetz mol naus – unn nämmt ä Naas voll „Nauszus“! mannheimer-morgen.de/kall, Kontakt: kall@mamo.de

    Mehr erfahren
  • Kultur Isch geh zu de Krippo!

    Guckt Ihr a so gern Krimi wie isch, Ihr Leit? Do habbt da grad Gligg, dänn ehrlisch gsacht, kummt jo bald nix mehr ønnares im Färnseh. Uffäm änä Kanal, kwatschäsä in änarä Dur, uff de onnarä sinnse øm schießä, fafolgä, verheerä odda ga obduzierä. Wie gsacht, isch seh’s gärn, also liewa wie’s Gekwatschä vunn de ewisch gleischä Eiakepp. Awwa graad, weil allä Owend, uff zisch Senda än Krimi laaft, fallt ma do als wass uff... Unn isch kønn Eisch saagä: Wønn isch nochämol uff die Welt kumm, dønn geh isch zu dä Krippo! {element} Nädd weil isch so gärn Blut seh odda dursch Hinnaheef dennä Schdrømer noochrennä will. Ah nädd, weil isch so gern neschdäløng im Dienschdwaagä ohne Schtøndheizung vor irgendwelsche Hausdierä mutmaaßlischä Fabrescha observierä deed. Unn geh ma fort midd dennä Fafolgungsjagde egal ob zu Fuß odda middem Audo. Also isch, dess gewwisch offä zu, deed blooß wegä dämm Geld zu de Krippo wollä! Die missä do nämlisch ä schänes Geld fadiene, soviel schdeht feschd. Habbda Eisch schunn mol dennä ihr Wohnungä unn Heisa øgeguckt, hä? Wie so än Hauptkommissar, noch däzu gschiedä unn zwee Kinna, alläschdehend residiert – do fallda nix me oi! Egal ob Berlin, Malmö, Köln, Ystadt, Ludwigshafä, Genua, Leipzisch, Hømburg, Bozen odda Sylt: än Traum! Trotz Alimendä: Siwwä Zimma Altbau midd Schduck, Induschtrie-Lofts, so groß wie ä Schdrooßebøhn-Deppo, Pänthaus midd zweehunnerd Kwadratmeeda, Willä midd Fenschda biss uff de Boddä, nadierlisch midd Meerblick! Dess lossd mehrarä Schließ zu: Entwedda isch hab bei dännä Besoldungsgruppä im TVÖD falsch noochgeguckt. Odda s’iss kriminelli Kohlä im Schpiel, ihr guggt jo Krimis unn wissd schunn: Drogebarønä, Schmiergeld unnsoweida. Odda die hawwä alla Famieda, die nädd wegä Zaschda, sunnern bloß aus Menschäfroindlischkeit famiedä. S’iss unwahrschoinlisch, awwa jo a egal – denn wie dämm a sei: Glaabt ma, im neggschdä Lewä geh isch zu de Bolizei! Zum Kall: morgenweb.de/kall Kontakt: kall@mamo.de

    Mehr erfahren
  • Mundartglosse De Kall mähnt: Mønnema Baukunscht

    Schaffä, schaffä, Heislä bauä … føngä ma heid, wo’s um Bauä gehä soll, ruhisch mol schweewisch ø. Kehrda a däzu, zu de Bauschparer unn Heisläbaua?

    Mehr erfahren