Mundartglosse Härbschd im Winder

Von 
Ralf-Carl Langhals
Lesedauer: 
De Kall - Autor unserer Mundart-Glosse. © Walter Imhof

Wønn die Bledda øn de Bääm die Farwä ännarn, dønn nännt ma dess Härbschd. Wønn Møndatstreega die Farwä wechseln, nennt ma dess Polidik. Im Oktowa 2017 – also kalendameesisch im rischdischä Härbschd – iss soinazeit im Mønnema Gemoindärat de Grinä Thomas Hornung zum Schwatzä worrä. Dess hodd domols fer oinischi Uffregung gsorgt, war der doch vorher 13 (Owachd Ugliggszahl!) Monat Presseschprescha bei de Grinä im Schduddgadda Lønddaag. Domols war de Hornung schunn 21 Johr Mitglied bei de Umweltparddei.

AdUnit urban-intext1

Wønn die Bledda treiwa, brauchds jo schunn ordentlisch Wind, im Härbschd mähn isch. Minneschäns genau so viel Zugluft, wie wønn sisch die in de Wind khängdä Fähnsche drehä… – sachd de Häbädd, unn der kennt sich jo in de Polidik aus. Jetzad, noch 25 Johr Parddei-Mitgliedschaft, wechselt de neggschdä Køndidat s’Lager – unn dess middä im Winder! De CDUler Chris Rihm wolld nimmä middm Lewl unnäm Krønz (die Ønnarä schpielä jo schunn løng kä Roll mehr) zømmäschaffä – unn hoddnä im Härbschd (!) 2020 de Beddl hiegschmissä. Jetz issa zum Windablieher worrä bei de Grinä, wora sisch zunähmend „hiegezoge gfihlt hodd“ ... Was hodd dønn beim Rihm 25 Johr unn beim Hornung 21 Johr middä Gfihlä nädd gschdimmt, froog isch Eisch? 43 unn 42 Johr warnsä iwwarischäns bei ihrm Sinneswøndl alt. Unn dønn kummä die Gfihlä... Isch will nädd gfihllos aschoinä, awwa, isch habb des Gfihl, dass middänä ihrm Gfihl wass nädd schdimmt!

Warum isch misch do uffreeg? Gar nädd reeg isch misch do uff. Gsinnungswexl hodds imma mol widda gewwä in dä Polidik. Menschä unn Oischdellungä ännern sisch, hajoo. Mir wärd blooß im Hiebligg uff die øschdehendä Wahlä ä bissl komisch, wie noh sisch die Brida – unn wie ausdauschbar ihr Positionä ønschoinänd sinn. Awwa egal wie, regiert wärd zommä! Wer weeß, biss dohie iss de Söder vielleicht zu de Grinä unn die Baerbock in die CDU gewechselt … meeglisch iss jo wiema sieht alles. Es mähnt unn wunnert sisch

Kontakt: kall@mamo.de

Mehr zum Thema

Mundartglosse De Kall mähnt: Bleedä Frogä

Veröffentlicht
Von
Ralf-Carl Langhals
Mehr erfahren

Moi Lieblingswørd Vunn „Abblgrutze“ bis „zabbäduuschder“

Veröffentlicht
Von
rcl
Mehr erfahren

Mundartglosse De Kall mähnt: Gude Vorsetz

Veröffentlicht
Von
Ralf-Carl Langhals
Mehr erfahren

Redaktion Ralf-Carl Langhals studierte Jura, Germanistik, Romanistik, Theater- und Musikwissenschaft in Mannheim, Berlin und Nizza. Er arbeitete als Regieassistent und Dramaturg an verschiedenen deutschen Theater und schrieb danach als freier Theaterkritiker für SWR, Die Welt, Frankfurter Rundschau, Theater der Zeit u.a. Seit 2006 ist er Kulturredakteur beim Mannheimer Morgen, zuständig für die Bereiche Schauspiel, Tanz und Performance.

Thema : De Kall mähnt - Mundartglosse

  • Kultur S’geht widda „nauszus“!

    Ahh, härrlisch! Laue Liftschä wehä, die Temparadurä sinn gschdiggä unn die Clara, also die Sunn, hodd sisch a schunn ørdäntlisch bliggä lossä. So løngsøm wärd’s! Hierzulønd hamma dodefir än herrlischä Ausdruck, der die Rischtung gønz klar vorgibt: Es geht „nauszus“! Unn somit a uffwärts, hoffändlisch. Iwwa des schänä Wärdschä hawwisch schunnämol gschriwwä, dess iss wohr. Dess macht mir awwa nix, dänn „nauszus“ kehrt zu moinä persänlischä Lieblingswärda. Vunn Eirä schproochlischä Lieblingä unsara Muddaschprooch, diedama zugschiggt habt, iss dønn am Møndaag widda in de Zeidung zu lesä. Heit iss moi geliebdäs „nauszus!“ drø, dess, wønnda misch froogt, imma ä Ausrufäzeischä als Hoffnungsschimmer braucht. {element} Mønnschä, unn do hodds unna Lesa schunn Diskussiønä gewwä, sage eher „rauszus“, wass a in Ørdnung iss, mir persänlisch awwa näd so vunn de Zung geht. Falsch isses desdäwegä freilisch nädd, jedda rädd ewä, wieäm de Schnawwl gewachsä iss. {furtherread} Dess Drollischä øn „nauszus“ iss, dass es do ganädd ubädingt waam odda frihlingshaft soi muss. Aa wønn scharfä Windä dursch die Kurpalz wehä und de Friehling soi blaues Bønd noch nädd fladderä lossd: Nauszus geht’s trotzdem, weil’s ewä länga hell iss. Weil hier unn do wass Grienäs uffblitzt. Unn unnsa gudi Induschtrie-Luft gønz onnaschda rieschd. Nooch Schoklaad, Bier, Kokkosfett, Zellschdoff, Grillfleesch unn Seefäpulva rieschds jo do s’gonz Johr. Alla dønn, geht jetz mol naus – unn nämmt ä Naas voll „Nauszus“! mannheimer-morgen.de/kall, Kontakt: kall@mamo.de

    Mehr erfahren
  • Kultur Isch geh zu de Krippo!

    Guckt Ihr a so gern Krimi wie isch, Ihr Leit? Do habbt da grad Gligg, dänn ehrlisch gsacht, kummt jo bald nix mehr ønnares im Färnseh. Uffäm änä Kanal, kwatschäsä in änarä Dur, uff de onnarä sinnse øm schießä, fafolgä, verheerä odda ga obduzierä. Wie gsacht, isch seh’s gärn, also liewa wie’s Gekwatschä vunn de ewisch gleischä Eiakepp. Awwa graad, weil allä Owend, uff zisch Senda än Krimi laaft, fallt ma do als wass uff... Unn isch kønn Eisch saagä: Wønn isch nochämol uff die Welt kumm, dønn geh isch zu dä Krippo! {element} Nädd weil isch so gärn Blut seh odda dursch Hinnaheef dennä Schdrømer noochrennä will. Ah nädd, weil isch so gern neschdäløng im Dienschdwaagä ohne Schtøndheizung vor irgendwelsche Hausdierä mutmaaßlischä Fabrescha observierä deed. Unn geh ma fort midd dennä Fafolgungsjagde egal ob zu Fuß odda middem Audo. Also isch, dess gewwisch offä zu, deed blooß wegä dämm Geld zu de Krippo wollä! Die missä do nämlisch ä schänes Geld fadiene, soviel schdeht feschd. Habbda Eisch schunn mol dennä ihr Wohnungä unn Heisa øgeguckt, hä? Wie so än Hauptkommissar, noch däzu gschiedä unn zwee Kinna, alläschdehend residiert – do fallda nix me oi! Egal ob Berlin, Malmö, Köln, Ystadt, Ludwigshafä, Genua, Leipzisch, Hømburg, Bozen odda Sylt: än Traum! Trotz Alimendä: Siwwä Zimma Altbau midd Schduck, Induschtrie-Lofts, so groß wie ä Schdrooßebøhn-Deppo, Pänthaus midd zweehunnerd Kwadratmeeda, Willä midd Fenschda biss uff de Boddä, nadierlisch midd Meerblick! Dess lossd mehrarä Schließ zu: Entwedda isch hab bei dännä Besoldungsgruppä im TVÖD falsch noochgeguckt. Odda s’iss kriminelli Kohlä im Schpiel, ihr guggt jo Krimis unn wissd schunn: Drogebarønä, Schmiergeld unnsoweida. Odda die hawwä alla Famieda, die nädd wegä Zaschda, sunnern bloß aus Menschäfroindlischkeit famiedä. S’iss unwahrschoinlisch, awwa jo a egal – denn wie dämm a sei: Glaabt ma, im neggschdä Lewä geh isch zu de Bolizei! Zum Kall: morgenweb.de/kall Kontakt: kall@mamo.de

    Mehr erfahren
  • Mundartglosse De Kall mähnt: Mønnema Baukunscht

    Schaffä, schaffä, Heislä bauä … føngä ma heid, wo’s um Bauä gehä soll, ruhisch mol schweewisch ø. Kehrda a däzu, zu de Bauschparer unn Heisläbaua?

    Mehr erfahren