Wønn die Bledda øn de Bääm die Farwä ännarn, dønn nännt ma dess Härbschd. Wønn Møndatstreega die Farwä wechseln, nennt ma dess Polidik. Im Oktowa 2017 – also kalendameesisch im rischdischä Härbschd – iss soinazeit im Mønnema Gemoindärat de Grinä Thomas Hornung zum Schwatzä worrä. Dess hodd domols fer oinischi Uffregung gsorgt, war der doch vorher 13 (Owachd Ugliggszahl!) Monat Presseschprescha bei de Grinä im Schduddgadda Lønddaag. Domols war de Hornung schunn 21 Johr Mitglied bei de Umweltparddei.
Wønn die Bledda treiwa, brauchds jo schunn ordentlisch Wind, im Härbschd mähn isch. Minneschäns genau so viel Zugluft, wie wønn sisch die in de Wind khängdä Fähnsche drehä… – sachd de Häbädd, unn der kennt sich jo in de Polidik aus. Jetzad, noch 25 Johr Parddei-Mitgliedschaft, wechselt de neggschdä Køndidat s’Lager – unn dess middä im Winder! De CDUler Chris Rihm wolld nimmä middm Lewl unnäm Krønz (die Ønnarä schpielä jo schunn løng kä Roll mehr) zømmäschaffä – unn hoddnä im Härbschd (!) 2020 de Beddl hiegschmissä. Jetz issa zum Windablieher worrä bei de Grinä, wora sisch zunähmend „hiegezoge gfihlt hodd“ ... Was hodd dønn beim Rihm 25 Johr unn beim Hornung 21 Johr middä Gfihlä nädd gschdimmt, froog isch Eisch? 43 unn 42 Johr warnsä iwwarischäns bei ihrm Sinneswøndl alt. Unn dønn kummä die Gfihlä... Isch will nädd gfihllos aschoinä, awwa, isch habb des Gfihl, dass middänä ihrm Gfihl wass nädd schdimmt!
Warum isch misch do uffreeg? Gar nädd reeg isch misch do uff. Gsinnungswexl hodds imma mol widda gewwä in dä Polidik. Menschä unn Oischdellungä ännern sisch, hajoo. Mir wärd blooß im Hiebligg uff die øschdehendä Wahlä ä bissl komisch, wie noh sisch die Brida – unn wie ausdauschbar ihr Positionä ønschoinänd sinn. Awwa egal wie, regiert wärd zommä! Wer weeß, biss dohie iss de Söder vielleicht zu de Grinä unn die Baerbock in die CDU gewechselt … meeglisch iss jo wiema sieht alles. Es mähnt unn wunnert sisch
Kontakt: kall@mamo.de
